1251/2024-2025

Aizawl, the 22nd July 2024: Governor Dr Hari Babu Kambhampati chuan Regional Institute of Paramedical and Nursing Sciences (RIPANS) a tlawh.

Campus a thlen veleh Governor hian Dr Sanjay D Sawant, Director leh a thawhpuiten hruaiin, khum 100 awmna RIPANS Hospital sak thar chhunga section hrang hrang leh ward hrang hrangte an en tir a. RIPANS faculty te chuan kumin kum tawp lamah hospital hi thawk tan thei dawn tih Governor hnenah hian an sawi a. Hemi kaihhnawihah hian a panna kawngpui siam tha turin MPWD hnenah ngenna an siam a. Power supply leh tui supply-na atana PHED leh P&E Department-te puihna an mamawh thu an sawi bawk a. Heng thil pawimawh pathum te hi state lam atanga tihhlawhtlin sak an nih chuan anmahni lam chu Kumin kum tawp lam, October emaw November thlaah chuan Damlo leh a mamawh tu tan he Hospital hi hawn theih a beiseiawm an ti.

Governor Dr Hari Babu Kambhampati chuan campus chhunga Med Supdt Quaters, Doctors Quarters, Staff Nurse Quarters, Indoor Sports Complex & Auditorium, General Hostel, Guest House leh Academic Building Block - IV te, a then sak zawh fel tawh, a then la sak mek te a enfiah bawk.

Governor Dr Hari Babu Kambhampati pual hian RIPANS te chuan Conference Hall, RIPANS-ah official meeting tawi an buatsaih chhunzawm a. Meeting hi Dr Sanjay D Sawant, Director-in lawmthu sawiin tan a ni a. Dr Ruby Z Ralte , Administrative Officer chuan RIPANS chungchang tawi si, kimchang tak siin a presentation a pe bawk. Presentation zawhah hian Governor hnenah hian tun dinhmuna RIPANS in mamawh tlem a neih te leh Governor puihna an mamawhna te RIPANS thuneitute chuan an thlen nghal a ni.

Presentation a en hnuah Governor Dr Hari Babu Kambhampati chuan thusawina hun reilote a nei a. He hunah hian RIPANS hotute hnenah thu sawiin campus hmasawnna atana hna an thawh that thu a sawi a. Governor chuan nakin lawkah chuan he RIPANS Hospital tuna khum 100 awmna hi India rama Sawrkar damdawiin tha filawr AIIMS, Delhi te anga tih changtun a nih a beiseiawm tih a sawi. RIPANS Hospital, nakkum kum tir lama a taka hman theih tura beisei hian Mizoram tan chauh ni lo, hmarchhak bial pumpui tan pawh healthcare sector-ah service quality tha zawk a rawn belhchhah dawn avangin a lawm awm tih a sawi bawk.

RIPANS hi  kum 1995-96-a NEC hnuaiah din a ni a. 1st April 2007 khan Ministry of H&FW-ah sawn leh a ni a, tunah chuan, Ministry of H&FW, Government of India  in a enkawl bik  institute awmchhun a ni ta a ni. RIPANS chungchang chipchiar zawka hriat duh tan  website : ripans.ac.in ah a enchian theih.