1250/2024-2025

Aizawl 22nd July, 2024 : Ni 20.7.24-22.7.24 chhunga Pragati Maidan, New Delhi-a International Agriculture & Horti Expo, 2024 neihah Horticulture Department chuan lawmman pakhatna an dawng.

He expo-ah hian Horticulture Department chuan Mizoram chhunga thei leh thlai hrang hrang bakah thlai leh thei atanga thil siam chhuahte kengin an pho chhuak a, mipuiin an hlut hle a ni. Horticulture Department hi expo a tel ho zingah horticulture lam thil nei tha ber a thlan niin lawmman pakhatna an dawng a ni.

Prof. Lalnilawma, Horticulture Minister chuan State hrang hrang te'n stall an hawn te hi tlawhkualin Mizoram tana rawtna tha tak takte ngaithlain hun a hmang a. Minister hi Pi K. Lalrinzuali, IAS, Secretary, Horticulture Department, Pu C.H Lalmuanpuia, Director, Horticulture leh Officials dangte’n an ṭawiawm a ni.