DIRECTORATE OF INFORMATION & PUBLIC RELATIONS, Government of Mizoram, India

1249/2024-2025

Mamit 22nd July, 2024 : Vawiin khan Pu Lalnghinglova Hmar, Minister of State, Labour Employment, Skill Development & Entrepreneurship, Sport & Youth Services, Excise & Narcotics Department changtu chuan Mamit a tlawh a. Minister ho hian DC Conference Hall, Mamit-ah Pu Jacob Lalawmpuia, District Bawrhsap kaihhruaina-in Ruihhlo Do beihpui thlak a thawhho dan tur sawiho a thutkhawm a ni.

Pu Lalnghinglova Hmar chuan Mamit District chu ramri a nih avangin ruihhlo kalka leh kawng pawimawh tak a ni a, Mamit District chhungah pawh ruihhlo ti engemawzat an awm tih hriat a ni, engtinnge kan ram leh hnam hmelma lian tak ruihhlo hi kan do ang a, a ti mekte engtinnge kan enkawl ang? ala ti ve lote engtinnge kan ven ang tih chu ngaihtuahna tak tak senga kan vei tlan a ngai ta a, Mamit District-ah hian Sawrkar Department leh khawtlang anga hmalakna kalpui thin a ni a, Kohhran angin engtin nge hma kan lak ang tih vawiin hian kan sawiho a tul a, kan hnai vai mai a ruihhlo ngaite tana ke kan pen lo a nih chuan thi mai turin kan kalsan tho a ni, chuvang chuan Sawrkar Department, Khawtlang leh Kohhran te'n tihtak zeta ngaihtuahna senga hmala a, ke pen turin kalkhawmte a sawm a. Sawrkar chuan ram leh hnam hmelma ruihhlo do hna chu a ngaipawimawh hle a, a theih ang anga thawktute thuamchakte, khawtlang leh Kohhran anga thawhhona kalpuite leh ruihhlo do na tura mamawh sum leh thildangah pawh theihtawp a chhuah zel dawn thu a sawi bawk.

Pu Jacob Lalawmpuia, District Bawrhsap pawhin District huap ang pawha ruihhlo do tura theihtawp an chhuah dawn thu leh Excise Minister thahnemngaihna leh inpekna thuk tak chuan rahtha a chhuah ngei a beisei thu a sawi.

Vawiin thutkhawmah hian hmalakna tur hrang hrang sawiho a ni a, Mamit khawpui chhunga kohhran hrang hrang tangrualin ruihhlo ngaite khungkhawm a, enkawlna pekte, zirna school-ah karkhatah ni 1 tal ruihhlo do tura zirtirna pek nise tihte chu hmalakna tur atan chhawpchhuah a ni.

Kalkhawmte atang ruihhlo do tura hmalakna tura rawtna hrang hrangte sawihona hun hman zui a ni bawk.

Minister hian Ruihhlo do nana hman tur Rs. 10,000/- ( singkhat) Pu Vanlalchhuanga, President Sub- Hqrs YMA hnenah a hlan a ni.

Meeting-ah hian Pi Lalthangpuii Pulamte, SP Mamit, Pu Lalramsanga Sailo, Secretary Excise & Narcotics, Pu Z. Lalhmangaiha Commissioner, Excise & Narcotics, Pu Peter Zohmingthanga, Jt. Commissioner, Excise & Narcotics Department bakah Officials dangte, tlawmngai pawl hrang hrang aiawh, khawtlang hruaitu, Mamit khawpui chhunga Kohhran hrang hrang aiawh leh thalai pawl aiawhte leh thutharthehdarhtute an tel a ni.

Vawiin vek hian Pu Lalnghinglova Hmar, Excise Minister hian Mamit Excise Office tlawhin Pu Lalsangzuala Ralte, Asst. Commissioner, Excise & Narcotics Department, Mamit chuan a lo dawngsawng a, thawhtanni zing apiang a an neih thin chhung inkhawm hmanpuiin, thawktute fuihna thu a sawi a. Mamit District chu ramri-a awm in nih avangin thawktute pawh in hah hle-in ka ring a, thawktu kan indaihlo tihte chhuanlama hmang lovin, sawrkarin he hna thawk tur hian midang a neilo a ni tih hria a, mi pahnih/pathum hen tur khawpa thawkrim leh taimak chhuah turin thawktute a chah a ni.

Excise Minister hian Asst. Commissioner of Excise & Narcotics Staffs atanga Incentive Award dawngtu mi 8 te hnenah hlanna a nei nghal bawk a ni.

Pu Lalnghinglova Hmar, Minister hi Pu Lalramenga, PS bakah Excise & Narcotics Department-a hotute'n an tawiawm a ni.

Attachment