1267/2025-2026

Lunglei, 2025 Vawkhniahzawn thla ni 21: Vawiin khan Lunglei DC Conference Hall-ah Lunglei District Bawrhsap Pi Navneet Mann hovin Lungleia Independence Day 2025 hman dan tur rel a ni a. Sawrkar official-te, zirna in, pawl hrang hrang leh kohhran ai awhte an tel.

Chairman Pi Navneet Mann chuan ram ni pawimawh chu sawrkar department emaw, pawl bik emaw ta a ni lo va, ram mipui zawng zawng ta a ni tiin, urhsun taka hmang tur leh ngai pawimawh turin kal khawmte leh District mipuite a chah a. Independence Day hlawhtling taka hman a nih theih nan department, zirna in, pawl, kohhran leh mimal chanvo leh mawhphurhna pekte chu an chanvo ṭheuh ṭha taka hlen chhuah tum turin a chah bawk.

He ṭhut khawmah hian kum hmasa lama Lungleia ram ni pawimawh hman ṭhin dan tlangpui zul zuiin kum 2025 Independence Day hman dan tur hi ruahman niin, department leh tlawmngai pawlte kovah mawhphurhna hrang hrang nghah a ni.

Meeting chuan kumin Independence Day lawmna hi C. Ṭhuamluaia Mualah August ni 15, 2025 (Zirtawpni) zing dar 9:00-ah hman ni se, tiin a rel a. Mizoram Home Minister Pu K. Sapdanga chu khuallian tura beisei a ni a. Independence Day lawmna ceremonial parade buatsaih ṭha tih niin, ruahmanna siam turin SP leh DEO te kutah mawhphurhna dah a ni a. Chawhma dar 11:30-ah DC Bangla tual/Circuit House-ah 'VIP At Home' buatsaih ni se, tih a ni bawk.

Lunglei District-a chhawmdawlna in, damdawi in leh District Jail-ah te Independence Day pual ṭanpuina thilpek pek leh ṭha tih niin, kohhran leh NGO-ahte Independence Day puala ṭawngṭai tura ngenna thlen leh ṭha tih a ni a. Kum 2024-2025 chhunga national/state award dawng emaw, chawimawi phu mi hming ṭha chawimawi tur emaw an awm chuan a kaihhnawih department te'n DC office-ah hriattirin, Independence Day lawmnaah hian chawimawina hlan ni se, tih a ni a. Sports discipline ṭhenkhat aṭanga Independence Day 2025 puala inelna (tournament) buatsaih tura dilna lutte chu sum dinhmun azirin ruahmanna siam ni se, tih a ni bawk.

Independence Day ni-ah hian sawrkar office, zirna in leh sawrkar quarters-ah te India ram puanzar zar vek tura tih a ni a. Sawrkar hna thawkte chu Independence Day lawmnaah hian tel ngei tura beisei niin, khauh taka en zui tum a ni a. Mipuite pawh Independence Day lawmnaa tel vek turin Lunglei District Independence Day Celebration Committee chuan a sawm nghal a ni.