1266/2025-2026

Lunglei, 2025 Vawkhniahzawn thla ni 21: Vawiin khan Lunglei District TB (Tuberculosis) Forum chu Lunglei District Bawrhsap Pi Navneet Mann hovin Lunglei DC Conference Hall-ah an ṭhu khawm a. May ni 20, 2025 aṭanga TB zawn chhuah leh um bona tura beihpui thlak, 100 Days TB Campaign leh TB Mukt Bharat Abhiyan (TBMBA) kalpui meka hma laknate an thlir ho.

He ṭhut khawmah hian sawrkar official-te, NGO leh MJA ai awhte leh TB champion te telin, H&FW Health Services Directorate, Aizawl aṭangin Joint Director & State TB Officer Dr Zochhuanawmi hovin State TB Team te'n an telpui bawk a. District TB Officer Dr K. Lalhmachhuana chuan 100 Days TB Campaign leh TBMBA hnuaia hma lakna report a pe a. TB um bona tura beihpui thlak meka Lunglei District dinhmun sawi ho a nih bakah, chak zawka hma lak dan tur rawtna hrang hrangte sawi ho a ni bawk.

TB um bo tura beihpui thlak mekah hian Lunglei District chhung khaw hrang hranga TB vei hlauhthawnawm dinhmuna dingte chhinchhiah vek niin, khaw hrang hrangah kal chilhin TB enfiah, enkawl, chaw ṭha pek leh TB venna kawnga hma lakna te uluk leh ngawrh taka kalpui a ni a. May ni 20, 2025 aṭanga July ni 18, 2025 inkar chhungin Lunglei District-a khua/hmun 27-ah kal chilhin, kum, chin ṭhan, hriselna dinhmun leh khawsakna hmun azira TB kai hlauhthawnawma ngaih (vulnerable) mi 7,684 chhinchhiah zinga mi 5,701 (74.19%) te chu endik tawh an ni a. TB kai rinhlelh mi 1,937 chu X-Ray hmanga endik niin, an zinga mi 482 chu NAAT hmanga endik nawn an ni a. Beihpui thlak chhung hian thawktute'n an zawn chhuah aṭanga TB vei hmuh chhuah (active case finding) 8 leh damlovin damdawi in an pan aṭanga hmuh chhuah (passive case finding) 40 a awm a. Kumin 2025 January aṭanga July ni 21 thlengin Lunglei District-ah TB vei nem ngheh (notified) 88 an awm tawh.

India ramah kum 2025 chhunga TB um bo turin TB Mukt Bharat Abhiyan hnuaiah hian beihpui thlak mek niin, Lunglei District-ah pawh kumin kum tawp thlengin khaw hrang hrangah a tahtawla beihpui thlak turin ruahmanna siam a ni a. District TB Forum chuan khaw hrang hranga TB endikna buatsaihah thawktute ṭha taka lo thawhpui a, TB vei hlauhthawnawm endik ngai an tihte inendiktir zel turin District mipuite a ngen.

TB um bo beihpui thlak tura District TB Office-in hmachhawp an duan chu he ṭhut khawmah hian pawm niin, beihpui thlakna tur khuaa VC leh NGO-te thawhpuina nen hma lak dan kawng zawn ni se, tih a ni a. TB veite'n an inenkawl chhunga chaw ṭha an dawn theih nan Lunglei District-a mi inphal (Nikshay Mitra) mi/pawl 6 hnen aṭanga ṭanpuina sum hmuh hmangin damlo 23 hnenah ṭanpuina pek a nih tawh thu tar lan niin, damlo tam zawk ṭanpui an nih theih nan sawrkar office, NGO leh kohhrante hnenah Nikshay Mitra ṭanpuina sum thawh tura ngen ni se, tih a ni a. TB hmuh chhuah leh enkawl kawngah data ṭha, rin tlak leh kimchang zawk a awm theih nan mimal leh kohhran damdawi inte nen felfai zawka data inpek dan kawng zawn ni se, tih a ni bawk.

Nikshay Mitra ni tur hian thla tin ₹ 700/- hisapin thla ruk emaw, a aia rei emaw chhung atan ṭanpuina pek theih niin, District TB Forum chuan TB veite tan mi inphalte pen chhuak zel turin a ngen a. Heti anga inphal, ṭanpuina pe theite chu Lunglei District Senior Chief Medical Officer office-ah inhriattir theih a ni.