No.4126/2020-2021

Vawiin hi India ram in zalenna a hmuh champha Independence Day vawi 74-na a ni a; Lunglei District-ah pawh lawm niin Convention Centre kawtzawl, Lunglei-ah Pu C.Lalrinsanga Hon’ble Minister Agriculture, Irrigation & Water Resources, Cooperation Departments hovin hman a ni. Khuallian Pu C. Lalrinsanga chuan Hnam Puanzar pawtparhin, sipaiten zahna chibai an hlan a chhanglet a; Independence Day thuchah a sawi a ni.

Pu C. Lalrinsanga chuan ram dang awpbehna laka India ram hruai chhuak tura mi ropui kal hmasate inhlanna zahawm tak chu kan hre reng a, zalenna kan neih theihna tura he ram ropui tak dintute beisei leh hmathlir hlenchhuak turin keini pawh i inhlan thar leh ang u tiin kalkhawmte a sawm a. COVID-19 hripui leng chuan vawiinah hian ram tin, hnam tin min khawihin min ti buai a. He hrileng hian ram ropui leh ram rethei a thliar lova, invenna kawnga ke kan pen nat poh leh ram economy in a tuar emaw tih theihin kan lo awm ta hial a nih a. He hunah hian tanrual kan mamawh zual a, kan ram leh hnam dinhmun siamtha tura harh thar nana he hun khirh hi kan hman thiam erawh chuan he chhiatna hi malsawmnaah a chang ngei ang, a ti bawk.

Khuallian chuan Sawrkar hmalakna hrang hrang tarlangin Mizoram Sawrkar Flagship Programme “Socio Economic Development Policy (SEDP)’ hmangin sawrkarin kawng hrang hrangin hma a la mek a, a bik takin ei leh bara kan intodelh theihna turin nasa takin hma a la a ni, a ti.

Agriculture sector ah SEDP hnuaiah Vaimim leh Be lam chi tam zawk thar anih theih nan hmalak mek a ni a. Lunglei District ah hian khaw 20 ah vaimin cluster siam niin a bul tan nan ram Acre 300 tuam a ni a. Bio Fertilizer siamchhuah lamah pawh hmalak mek a ni. United Nations-IFAD Programme pakhat FOCUS scheme chu chak takin kalpui a ni a, thlai leh theitiak leh thlai chi chi hrang hrang sem a ni a. U. N peng pakhat F.A.O hnuaiah Global Environment Facility hnuaia Green – Ag project chu Mizoramah pawh kumin atanga kalpui niin Lunglei khawpuiah Green Landscape Implementing Unit Office hawn a ni.

Irrigation & Water Resources Department ah hian scheme leh project engemawzat kalpui niin Kum 2019-20 chhung khan Mizoramah Minor Irrigation Project 36 leh PMKSY hnuaiah Command Area Hactare 1723 cover tur project kalpui a ni a. Lunglei Division chuan kawng hrang hrangah hma ala mek zel a. NABARD hnuaiah ram Hectare 64 tuam turin Minor Irrigation Project pahnih kalpui mek niin PMKSY hnuaiah ram hectare 257.70 tuam tur Minor Irrigation Project (5) panga kalpui mek a ni bawk.

Co-operation Department hnuaiah Mizoramah tun dinhmunah Primary Cooperative Society hi 1157 neiin State Level Cooperative Society 11 kan nei bawk a. Assistant Registrar of Cooperative Societies, Lunglei District hnuaiah hian Cooperative Society 201 kan nei tawh a ni, a ti.

High Powered Committee, Lunglei chuan hmasawnna kawng hrang hrangah la in hma lam a pan zel a. Artui ah Lunglei kan intodelh theih nan theih tawp chhuahin tunah hian ar vulhtute hnenah ar note sing chuang sem chhuah a ni tawh a. Department hrang hrang nen a thawk hovin HPC Lunglei hnuaiah Developmemt works Cheng Vaibelchhe 6 chuang man thawh a ni tawh bawk a. Tin, ‘Leitlangpui Rahbi’ tiin Entreprenuership lama kan thalaiten hma an sawn nan in elna thianghlim leh hlawk thlak tak chu hlawhtling taka buatsaih a ni.

Power and Electricity Department hnuaiah Superintending Engineer (P&E), Lunglei Power Circle kaltlangin Sawrkarin 132Kv Single Circuit Transmission Line Melriat to Khawiva chu a peih fel tawh a. He project hi Cheng Nuai 4498.07 seng a siam a ni.

School Education Department hnuaiah Mizoram sawrkar chuan Lunglei District chhungah Primary School Zirtirtu 32 leh Middle School Zirtirtu 2 a rawn dah thar a. Tin, sawrkar school engemawzat school building-te sak thar an ni bawk.

PWD Building Division, Lunglei kaltlangin 2019-20 chhungin Cheng Nuai 1,828.25 sengin Building 4 (pali) sak zawh a ni a. Tin, building sak mek hi 23 awmin heng atan hian Cheng nuai 8,852.47 ruahman a ni bawk.

National Highway No 54 ‘A’ leh 302 NHIDCL kutah hlan theih turin National Highway Division-IV, Lunglei chu a inpeih tawh a ni. Tin, PWD Lunglei Division kaltlangin kum 2019-20 chhungin kawng hrang hrang 13 laih a ni a. A vaiin Km 211.94 a ni.

Rural Development MGNREGS hnuaiah Cheng nuai 64 chuang sengin hmasawnna hnathawh a ni bawk. Lunglei District Accounts and Treasuries office kaltlangin kumin chhungin, May thla thleng khan, Pensioner leh an chhungte hnenah Cheng vaibelchhe 74 chuang pekchhuah a ni tawh a ni. District Vety. Hospital sak pawh zawh thuai beisei a ni. Lungpuizawl-a Hatchery and Poultry Farm Building sak hna pawh peihfel mai theih a ni tawh a ni. Lunglei-in Nursing School tha tak kan nei a. Hetah hian 2019 thleng khan Batch 25 ngawt maiin an zirchhuak tawh a ni.

Mizoram State Finance Commission (MSFC) hnuaiah kum 2019-2020 Financial year chhungin, Lunglei District (undivided) chhunga Village council 143-te hnenah Cheng Nuai 175.125 pek chhuah an ni. District Transport Office, Lunglei kaltlangin Lunglei District mipuite hian 2019-20 chhung khan lirthei chhiah chi hrang hrang atangin Sawrkarah Cheng vaibelchhe 4 leh Nuai 82 an chhung a ni. Taxation Deptt hnuaiah Lunglei District hian 2019-20 chhungin chhiah chi hrang hrang - GST, Professions Tax, VAT leh Entertainment Tax ah te Cheng vaibelchhe 6 leh nuai 45 an chhung bawk a ni. Lunglei Forest Division hian kum 2019-20 chhungin sawrkar revenue ah Cheng Nuai 24 chuang an chhung lut bawk.

Misssion for Integrated Development of Horticulture (MIDH) hnuaiah Farmer te tan Community Water Tank leh Individual Tank-te siamsak an niin heng Darzo, Thaizawl leh Haulawngah te hian hlawhtling taka siam fel a ni bawk. DCSO Lunglei kaltlangin National Food Security Act, 2013 kalpui tura hmalak mek niin beneficiary mi nuai 1 leh sing 9 chuang thlanfel an ni tawh. Land Revenue & Settlement Department kaltlangin Lunglei District chhunga NH-54, Km 143 laih zauh mekah compensation atan Cheng Vaibelchhe 300 chuang sem a ni tawh bawk.

Minister chuan Lunglei District-a sawrkar hmalakna hrang hrang a tarlante chu Department thawktute inpekna leh Lunglei District mipuiten Sawrkar an thlawp thatna avanga hlawhtling a ni tiin an chungah lawmthu a sawi a. Covid-19 hrileng do kawngah pawh Sawrkar Department hrang hrang leh khawtlang hruaitute, mipui mimir leh Task Force te inpekna leh thawhhona tha tak kan neite hi a ropui tak meuh a ni, a ti bawk. Kan thar chhuah ve theih reng, kan siam chhuah ve theih reng leh kan deh chhuah ve theih reng hi hmun dang atanga sum tam tak senga lei kan tum tlat reng anih chuan engzat a tam pawh sum chu nei mah ila, retheihna bawk kan hmachhawn zel dawn a ni tiin kawng hrang hranga kan State intodelhna turin theihtawp kan chhuaha kan tan tlan a tul takzet a ni, a ti a. Vawiin ni pawimawh tak, India Independence Day vawi 74-na hi kan ram tan, Lunglei District tan, bul kan tan thar na ni lo nimawlh rawh se tiin District mipuite Independence Day chibai a buk a ni.

Independence Day lawmna function neih zawhah hian sawm bik te tan VIP At Home chu Convention Centre kawtzawlah neih chhunzawm nghal a ni.