No.1859/2021-2022

Lunglei the 15th August, 2021 : Vawiin hi India ram in zalenna a hmuh champha Independence Day vawi 75-na a ni a; Lunglei District-ah pawh lawm niin Lunglei DC Office kawtzawl, Lunglei-ah Pu C.Lalrinsanga Hon’ble Minister Agriculture, Irrigation & Water Resources, Cooperation Departments hovin hman a ni. Khuallian Pu C. Lalrinsanga chuan Hnam Puanzar pawtparhin, sipaiten zahna chibai an hlan a chhanglet a; Independence Day thuchah a sawi a ni.

Pu C. Lalrinsanga chuan ram dang awpbehna laka India ram hruai chhuak tura mi ropui kal hmasate inhlanna zahawm tak chu kan hre reng a, zalenna kan neih theihna tura he ram ropui tak dintute beisei leh hmathlir hlenchhuak turin keini pawh i inhlan thar leh ang u tiin kalkhawmte a sawm a.

COVID-19 hripui leng chuan vawiinah hian ram tin, hnam tin min khawihin min tibuai a, ‘He hrileng avanga harsatna nasa tak kan tawh karah mi tlawmngai, thahnemngai leh mi in phal tam tak an rawn pen chhuak a, tha thlah lovin hrileng do kawngah nitin theihtawp an chhuah a. Sawrkar lama mawhphurhna neitute, VLTF-te, tlawmngai pawl hrang hrang leh mipuite hmalakna leh tanrualna hi a ropui ka tiin in zavai chungah lawmthu ka sawi hmasa duh a. Kan District chhunga kuthnathawktuten an thlai thar phal taka khawpuiah a thlawna an rawn pe thin te hi a ropui ka ti takzet a, an chhuanawm ka tiin an chungah lawmthu ka sawi bawk a ni. Harsatna lian tham tak kan hmachhawn laia kan tanrual tlatna hian rah tha tak ala chhuah ngei ka ring bawk a ni,’ a ti.

Khuallian chuan Lunglei District-a sawrkar Department hrang hrang hmalakna tlangpui tarlangin Independence Day Speech a sawi a ni.

Agriculture sector-ah Sawrkarin hmachhawp tam tak neiin Central Sawrkar Scheme hrang hrang PMKSY, RKVY, NFSM, MOVCD leh a dangte bakah state sawrkar hmalakna kawng hrang hrangah hmuh tur a awm zel a. Ni zung chakna tha (Solar Power) hmang tangkaia tui pekna (Pump Set) chu PM-KUSUM leh RKVY kalpui tum a ni a, Kolasib District-a Pangbalkawn khuaa Rice Mill din kaltlangin District hrang hrang kuthnathawktute tharchhuah awmze neia tihralna kawng hawn a ni. Potato Tissue Culture (Alu chi siam)hmunpui din tura inbuatsaih mek anih bakah Agriculture Department hnuaia Laboratory hrang hrang – Soil Testing Laboratory-te, State Bio-Control Laboratory-te, State Pesticide Testing Laboratory-te tih changtlun chhoh mek a ni a. Sawrkar chuan NABARD atanga Loan la-in loneitute tana thlai thar dah khawmna tur Warehouse (Godown) hmun 8-ah a sa mek a, hmun 10 dangah sak tum leh mek a ni.

Irrigation & Water Resources hnuaiah PMKSY – Har Khet Ko pani hnuaiah Cheng nuai 4246.92 ruahman niin Minor Irrigation Project 36 kalpui niin hmun 13-ah Ground Water Irrigation project kalpui a ni bawk. National Hydrology Project (NHP) hnuaiah Hydrological Information System tha tak neih tuma hmalakna kalpui a ni a. JICA hnuaiah kum 2022 a zawh tur ‘Project on capacity Enhancement for Sustainable Agriculture and Irrigation Development’ kalpui mek a ni bawk.

Cooperation Department hnuaiah PMVDY, Van Dhan Mission hnuaiah registered Cooperative Society-te chu Van Dhan Kendra Cluster atan organize niin Phase hnih-a kalpui mek a ni. Phase -I ah Kendra 44 din niin Phase-II atan hian Kendra 115 din leh mek a ni.

AH&Vety Department hnuaia hmalakna lian tham kalpui mek District Veterinary Hopital sak chu 90% zawh tawh niin luah tur a inbuatsaih mek a ni. Hatchery & Poultry Farm, Lungpuizawl - Layer Ar 2000 vulh theihna tur pawh sak zawh tawh a ni. Tun kum chhung hian AH&Vety Department Lunglei chuan Rs. 26,77,465/- zet la khawmin Sawrkar ah a chhunglut a ni.

Lunglei DEF - in Covid-19 dutyngawrh taka kalpuiin ‘Prevention and Containment of Covid 19 Act’ hnuaiah Rs. 13,32,100/- zet dan bawhchhia te an fine tawh a ni. Traffic management lamah pawh tan lak zel niin khawpuiah Traffic signange te a tul angindah belh niin duty pawhin ruat belh an ni a.Mipui himna atan a pawimawh tak mai Lunglei Town Surveillance Project hnuaiah hmun hrang hranga CCTV dah chu a hlawk thlak hle bawk a ni.

Lunglei District-ah 2020 - 2021 chhung khan Damdawiina nau nei chu 77% kan ni a. Tin, Immunization ah pawh 96% lai kan hlawhtlin pui thei a ni. Covid-19 hrileng do let kawngah medical lam thawkuten theihtawp an chhuah mek zel a. Covid-19 positive enkawlna hmun Dedicated Covid Health Centre (DCHC) pakhat leh Covid Care Centre (CCC) pakua (9) an enkawl mek bakah VLTF-te nen tangkawpin Community Covid Care Centre (4C) veng/khua 25-ah hawn a ni.

Covid-19 pandemic leh ramri boruak duhawm lo thleng thin karah Lunglei District-ah Ration buhfai thla tin khai lak lova sem chhunzawm zel niin Pradhan Mantri Garib Kalyan Anna Yojana PMGKAY Scheme hnuaiah mi harsa zawkte hnenah buhfai a thlawna sem a ni bawk.

Horticulture Department hnuaiah High Powered Committee (HPC), Lunglei kaltlangin Leitlang Tumeric Powder Product tha tak nei turin Tumeric Processing Unit hmun thum - Lungsen, Rahsiveng leh Ramthar-ah din a ni. Chhungkaw 20 hnenah Iskut chintir an ni bawk.

Kum 2020-21 chhungin Mizoram sawrkarin HPC Lungleiah cheng nuai 495.43 a dah a. Covid-19 hrileng avanga harsatna tawh mek karah HPC Lunglei chuan ei leh bar intodelhna kawnga hmalak chu thupui berah neiin Agriculture, Horticulture, Animal Husbandry & Veterinary, Fishery, Soil Department etc. te nen tangkawpin hma a la a ni.

Tun dinhmunah Lunglei District-ah MGNREGS Job Card Holder mi 31,849 awmin June 2021 thleng khan ni 40 inhlawhna siam tawh a ni. PMAY hnuaiah kum 2020-2021 chhungin beneficiary chhungkaw 786 hnenah insak tanpuina Rs. 1,30,000/- theuh pek chhuah a ni.

Lunglei District-a Primary leh Middle School naupang 16,891 hnenah Rs 600/-theuh School Uniform Grant pek niin a vaiin Rs. 101,34,600/-(Cheng nuai za leh pakhat, singthum sangli zaruk) sem chhuah a ni. Elementary School naupang 13,428 leh Middle School naupang 83,500 hnenah zirlaibu a thlawnin sem a ni bawk.

Taxation Department hnuaiah Lunglei District hian 2020 - 2021 chhungin chhiah chi hrang hrang - GST, Professions tax, VAT leh Entertainment Tax ah te Cheng Nuai 845.61 kan chhung a ni.

SBM Urban hnuaiah Vantlang Inthiarna tur sawmthum chuang sak tawh niin, Vantlang zunin sawmhnih, mimal Ek in 161 sak zawh tawh a ni.

District Transport Office, Lunglei kaltlangin Lunglei District mipuite hian 2019 - 20 chhung khan lirthei chhiah chi hrang hrang atangin Sawrkar ah 2,62,59,999 (Vaibelchhe hnih, nuai sawmruk pahnih leh zakua, sawmkua pakua) kan chhunglut a ni.

Kum 202-21 chhung khan Land Revenue & Settlement Department kaltlangin chhiah chi hrang hrang Rs.2,24,68,942/- (Cheng vaibelchhe hnih, nuai sawmhnih pali, sing ruksang riat za kua sawmli pahnih) sawrkarah chhungluh a ni a.

Lunglei Forest Division hnuaiah thing tiak 1,08,078 enkawl mek niin kum 2020 - 2021 chhungin Sawrkar revenue Cheng Nuai 16 chuang an chhung lut a. Kumin April-June chhungin cheng nuai hnih a chhung lut thaw bawk a ni.

Kum 2020 – 2021 chhung khan 2nd Battalion MAP atangin Bihar, Assam, West Bengal, LADC leh Serchhip Bye Election-ah te sipai duty chhuakin Covid-19 hrileng do kawngah leh ramri venghimin an duty mek bawk a ni.

Lunglei khawchhung leh a chhehvel khuate chawmtu tur Kawmzawl-ah 2x25MVA, 132/33kV Sub-Station siam hna hi chak taka thawh mek a ni a. Tunah hian 80% hna thawh zawh tawh niin September 2021 ral hma-a commissioned tum a ni.

PWD Building Division, Lunglei kaltlangin Building sawm – Digital Planetarium, Zohnuai, District Science Centre, DC Staff Quarter, LGC Auditorium etc sak hna kalpui mek an ni.

Kum 2020-2021 chhunga PWD, Lunglei Division hnuaiah PMGSY kawng hmun hrang hrang sawmpathum (13) ah cheng nuai 23,705.88 kawng laih hna thawh mek a ni.

Lunglei Water Supply Maintenance Division hnuaiah May 2021 atang khan Online Payment System tlangzarh a ni a. 2020-2021 chung khan tui connection thar 617 pek chhuah niin tui bill cheng nuai 376.46 sawrkarah chhung luh a ni.

Minister chuan Lunglei District-a sawrkar hmalakna hrang hrang a tarlante chu Department thawktute inpekna leh Lunglei District mipuiten Sawrkar an thlawp thatna avanga hlawhtling a ni tiin an chungah lawmthu a sawi a. Vawiin ni pawimawh tak, India Independence Day vawi 75-na hi kan ram tan, Lunglei District tan, bul kan tan thar na ni lo nimawlh rawh se tiin District mipuite Independence Day chibai a buk a ni.

Independence Day lawmna function-ah hian Lunglei District sawrkar schol atanga HSLC leh HSSLC Topper te hnenah leh AB-PMJAY hnuaia Hospital ti Tha Lawmman Sem ni in

HSLC Toppers.
1. Lalbiakzuali Hmar 86.4% Govt. Venglai High School, Lunglei
2. Christina Lalramdinngheti 86.2% Govt. tawipui 'S' High School, tawipui
3. C.Lalruatmawii 86.2% Govt. High School, Lunglei

H.S.S.L.C Toppers.
Arts Stream
1. T.Lalmuanpuia 83.2% Govt. Higher Secondary School, Lunglei
2. T.Lalrinfeli 81.2% Govt. Higher Secondary School, Lunglei
3. Miriam Lallawmawmi 76.4% Govt. Higher Secondary School, Lunglei

Commerce Stream
1. B.Luanngaihkimi 72% Govt. Higher Secondary School, Lunglei
2. Jessica Zomuanpuii Fanai 67.8% Govt. Higher Secondary School, Lunglei
3. Lalduhsaki 65.4% Govt. Higher Secondary School, Lunglei

Science Stream
1. Laldipuia 67.6% Govt. Higher Secondary School, Lunglei
2. Laltlanhlua 67.2% Govt. Higher Secondary School, Lunglei
3. Francis VL.Hruaitluanga 66.6% Govt. Higher Secondary School, Lunglei

Hospitals
Sawrkar Hospital ah Civil Hospital, Lunglei chu pakhatna ni in Private Hospital ah Kristian Hospital, Serkawn chu pakhatna an ni.