1596/2024-2025

2024 Thlazing ni 15: India ramin zalenna a hmuh ni, Independence Day vawi 78-na chu ram chhung hmun dang rualin vawiin khan Lungleiah pawh urhsun takin lawm a ni a. A lawmna pui ber C. Ṭhuamluaia Muala buatsaihah Public Works Department, Transport Department leh Parliamentary Affairs Department Minister Pu Vanlalhlana chu Khuallian a ni a, Mizoram Legislative Assembly Deputy Speaker Pu Lalfamkima chu khual zahawm a ni.

Sawrkar Laipui ruahmannaa August ni 13 aṭanga ni 15 chhunga in tina Ram Puanzar (National Flag) zar tur tih a nih angin Lunglei District chhunga sawrkar pisa, hmun pawimawh dang leh mimal inah te India Ram Puanzar zar a ni a. Independence Day ni bikah hian zing dar 9:00-ah C. Ṭhuamluaia Mualah Khuallianin Ram Puanzar pawt pharhin, Ram Puanzar chibai buktu parade contingent 31 te chibai buk a chhang let a. Independence Day thuchah a sawi nghal a ni.

Khuallian Pu Vanlalhlana chuan Lunglei District mipuite chu zalenna chibai bukin, India ram zalenna atana beitu ram hruaitute hre renga zahna chibai buk thar a, ram tana an hmathlir leh duhthusamte a hlawhtlin theih nan leh an thisen leh thlantui hmanga an valh sa India ram ropui nan leh hmasawn zel nan theih tawp chhuah turin a sawm a. District hmasawnna atana sawrkar, tlawmngai pawl, kohhran leh mipui ṭan rualna chuan rah ṭha a chhuah tih sawiin, Myanmar, Bangladesh leh Manipur aṭanga an sahimna zawnga lo tlan lut kan unaute tuamhlawm leh chhawmdawl kawngah sawrkarin theih tawp a chhuah bakah, NGO, kohhran, pawl hrang hrang leh mipuite'n hmangaihna an lo lantir chu ropui a tih thu sawiin, hnam inunauna leh inpumkhatna vawng nung zeltu, Zofate ram leh hnam ropui zawka din chhuaktu a nih a beisei thu a sawi a ni.

Khuallian chuan Lunglei High Powered Committee (HPC)-in kum 2023-2024 chhunga Lunglei District-a hmasawnna hna thawh nana Mizoram sawrkar aṭanga ₹ nuai 500 a dawn hmangin District chhungah sawrkar department/agency paruk kal tlangin hmasawnna hna chi hrang hrang 120 thawh a nih thu sawiin, Lunglei Municipal Council (LMC) hnuaiah Lunglei khawpui inrelbawlna leh inenkawlna felfai tak a awm theih nan hma lak a nih thu leh LMC-in Lunglei khawpui huam chhunga parking fee khawn, trade licence pek chhuah, property tax assessment lak, sanitation leh hoarding & advertisement phalna pek te a kalpui mek thu a sawi a. Urban Development & Poverty Alleviation (UD&PA) Department hnuaiah khawpui chhung bawlhhlawhte awmze nei zawka sawngbawlna hmun tur - Lunglei Solid Waste Management Centre (near Riangvai Thlanmual) chu ₹ nuai 600 senga sak mek a nih thu leh kumin chhunga peih fel beisei a nih thu te, Lunglei Solid Waste Management Centre Phase-II tur pawh Pukpui ram, Tlawng road-ah a hmun tifela hma lak mek a nih thu te, Serkawn Ramzotlang Community Hall ₹ nuai 100 senga sak zawh a nih thu te a sawi a. ₹ nuai 919 senga sak, Lunglei District Museum thar, Sazaikawna mi chu July ni 19, 2024 khan hawn a nih thu a sawi. 

Khuallian chuan Chief Minister Hand Holding Scheme, ‘Bana Kaih’ hnuaiah horticulture lama hmasawnna turin Lunglei District chhunga zau (cluster) 20-a hma lakna tur project proposal siam a nih thu sawiin, Agriculture leh a kaihhnawih department hrang hrang hnuaiah kut hna thawktute leh ran vulhtute tan sum fai leh hmanruaa ṭanpuina bakah, thiam thil kawhhmuh leh kaihhruaina chi hrang hrang pek a nih dan a tar lang a. District chhungah chhungkaw 3,112-in sawhthing quintal 12,840; chhungkaw 620-in aieng quintal 2,578; chhungkaw 805-in hmarcha quintal 58 an ching tih tar langin, sawhthing chingtute hnenah a tâm venna damdawi fungicide ṭhahnem tak pek chhuah a nih thu leh a chi chiah nan leh a tâm vên nan an hman ṭangkai thu a sawi.

Khuallian chuan Public Works Department (PWD) hnuaiah inkal pawhna kawngpui leh hmasawnna ruhrel ṭha leh tlo a awm theih nan hma lak a nih thu sawiin, Lunglei District-ah kum 2023-2024 chhungin kawng kilometre 56.670-a thui formation cutting, KM 35.130-a thui black top (flexible pavement), KM 19.543-a thui concrete pavement, running metre 2,976.92-a sei protection wall leh culvert 233 siam zawh a nih thu a sawi a. District Transport Office, Lunglei hnuaiah August 2023 – July 2024 inkar chhungin lirthei thar 2,492 ziah luh a nih thu leh hemi hun chhung hian driving licence thar 4,711; renew 3,127 leh conductor licence 5 pek chhuah a nih thu sawiin, registration fee, tax, licence leh compounding aṭanga revenue sum hmuh zawng zawng chu ₹ 2,11,47,157/- a nih thu leh MST Town Bus leh Line Bus tlanna aṭangin ₹ 16,44,417/-hmuh a nih thu a sawi.

Khuallian chuan District mipuite hriselna atana Health & Family Welfare Department hma lakna fakin, Civil Hospital Lungleiin India rama hospital ṭha bik tehna, National Quality Assurance Standards (NQAS) certification bakah, MusQan (naupang lam enkawlna ṭha bik) leh LaQshya (nau neihna hmun ṭha bik) certificate an dawng chu chhuanawm a tih thu a sawi a. District ralmuan nana thawktu District Police-te hma lakna fakin, July ni 11, 2024-a Lunglei DEF hnuaia 'Cyber Cell' thar hawn chu cyber crime leh IT kaihhnawih dan bawhchhiatna chhui chhuahna kawngah a ṭangkai dawn hle tih a sawi a. Ruihhlo laka Lunglei District then thianghlim a nih theih nana Excise & Narcotics Department hma lakna fak bawkin, Nasha Mukt Bharat Abhiyan hnuaiah India ram chu ruihhlo awm lohna rama siam tura hma lakna kalpui mek a nih thu sawiin, ruihhlo chu ram tichhetu leh ṭhalaite nun suattu a nih avanga theih tawp chhuaha do zel tur leh ruihhlo laka fihlim tum tlat turin ram mipuite a chah a ni.

Khuallian chuan School Education Department hnuaiah District-in zirnaa hma a sawn theih nan kawng hrang hranga hma lak a nih thu leh zirlaite tan free uniform, free textbook leh mid-day meal scheme kalpui zel a nih thu tar langin, tun dinhmunah Lunglei District-ah private sikulte nen vek sikul 574 awmin, he’ng sikulahte hian zirlai 22,153 awm anga chhinchhiah a nih thu a sawi a. FCS&CA Lunglei hnuaiah AAY (card eng) 3,650 (member 8,489); PHH (card pawl) 25,961 (member 1,01,245); Non-NFSA (card var) 1,748 (member 64,426) leh NER Card 7 (member 23) a awm mek thu leh tun hnaiah Mizoram Sawrkarin ration card then thianghlim tuma theih tawp chhuahin, Minister, MLA leh Group A officer-te chu an ration card-te NER-a let vek tura hma a lak thu a sawi.  

Khuallian chuan MGNREGA hnuaiah Lunglei District-ah job card 20,632 a awm mek thu leh kum 2024-2025 sawrkar kum kal mekah ni 49 inhlawhna siam a nih tawh thu a sawi a. He'ng bakah hian ei leh bar, tui, eng, chaw ṭha, hriselna leh thianghlimna leh mipui himna tur leh mipui tana hamṭhatna hrang hrang chungchanga sawrkar department hrang hrangte hna thawh leh hlawhtlinnate a tar lang bawk. (NB: Khuallian thu sawi kimchang chu a hnuaia link-ah hian chhiar theihin a awm)

https://dipr.mizoram.gov.in/post/india-independence-day-vawi-78-na-lawmna-c-thuamluaia-mual-lungleia-khuallian-pu-vanlalhlana-honourable-minister-public-works-department-transport-department-parliamentary-affairs-department-government-of-mizoram-thu-sawi-lunglei-district-15thaugust-2024

Khuallianin thu a sawi zawh hian ceremonial parade lawmman bakah, chawimawina leh lawmman dang sem zui nghal a ni a. Ceremonial parade-ah hian armed contingent 4, unarmed contingent 7, school contingent 17 leh pipe band 3 an awm a. Pu Lalmawizuala (SDPO Tlabung) chu Parade Commander niin, Pu ZD Lalremruata (Sub-Inspector, Lunglei DEF) chu 2nd Parade Commander a ni a. Parade commander-te bakah, band party 3 leh unarmed leh school contingent pathumna chin lawmman pek niin, armed contingent 4 leh parade contingent dang 18 chu participation prize pek an ni bawk.

Independence Day 2024 ceremonial parade-a ti ṭha lawmman dawngtute chu: