No.1200/2020-2020

Nimin khan Lunglei District Level Task Force on COVID-19 chu an Chairman Lunglei DC Pu V.Lalsangliana hovin Lunglei DC Conference Hall-ah an thukhawm a.  COVID-19 vanga inkharkhip thawh lina kalpui dan tur an sawi ho.

Chairman Pu V.Lalsangliana chuan COVID-19 avanga inkharkhip thawh lina, May ni 18 atanga ni 31, 2020 chhunga kalpui chhunzawm dan tura state sawrkar atanga ruahmanna awmte a sawi fiah a. Hemi ruahmanna bawh zui dan tur leh a hlawhtlin theih nana hma lak dan tur hrang hrang te, COVID-19 laka him tura Lunglei District chhunga chet lak chhunzawm dan tha ber tur te ngaihtuah ho a ni. 

Hmun hrang hranga Mizoram mi leh sa tangkhangte an rawn haw belh zel dawn avangin kan fimkhur zual sauh a pawimawh takzet a ni tiin Lunglei Bawrhsap chuan sawrkarin tih tur leh tih loh tur a tih te tha taka zawm tlat turin mipuite a chah nawn leh a ni.

Lunglei CMO Dr Thani Pachuau chuan hmun hrang hrang atangin Mizoram mi leh sa tangkhangte an rawn haw mek a, Red Zone atanga rawn haw te pawh an awm dawn avangin Covid-19 laka kan him tlan  theih nan tun hi fimkhur tul hun lai ber a ni, a ti bawk.  

Inkharkhip thawh linaah hian a hma aia inthlah dulna lai awm mah se, sawrkarin zawm tur dan a zamte chu khauh taka ken kawh a ni dawn a. He thut khawmah hian inkharkhip kalpui mek atanga thlak danglam awmte inhrilhfiah a ni.

Sawrkar ruahmanna anga state pawna tangkhangte hruai kir mek chungchangah lo la haw belh turte chu a theih chin chinah District Headquarters (Lunglei)-a sawrkar enkawl inkhung hrannaah dah theih dan ngaihtuah tum niin, hemi atan hian kohhran hrang hrangte chu kohhran hall te hmantir tura ngen an ni a. Tun dinhmunah Lunglei khaw chhunga kohhran 15-ten an hall Quarantine Facility-a hman an phal thu DLTF an rawn hriattir tawh a, vawiinah hian Lunglei DLTF member-te chu Group li (4) ah inthenin heng Kohhran te hi an tlawh anga, an facility neihte an endik dawn a ni. Lunglei District mi leh sa tangkhang rawn haw duh hming pe tawh te chu tun dinhmunah mi 960 (mipa – 496, hmeichhia - 464) an ni a. Tangkhang rawn haw belh turte dawl zo tur Quarantine Facilities tur ngaihtuah mek zel a ni a, hetih lai hian rawn haw tur zat hi a danglam ve zel avangin district thuneitute chuan a tul angin ngaihtuahna an seng zel bawk a ni. Tun dinhmunah Lunglei District ah quarantine facility-a khunghran mek mi 65 an awm a ni.

DLTF chuan inkharkhip thlah dul a nih avang hian COVID-19 hi a hlauhawm ta lo tihna a nih loh avangin mipuite chu fimkhur reng tur leh tul bik tak tak lovah chuan pawn chhuah tum lui lo turin a ngen a. Kum 65 chin chung lam te, taksa hriselna lama harsatna nei sa te, nau pai te leh naupang kum 10 hnuai lam te chu mahni inchhunga inkharkhip tha leh zual tura chah an ni.

 Inkharkhip thawh lina kalpui chhung hian khawlaia mihring inhnaih chilh loh (social distancing) chu zawm zel tur niin, mi panga aia tam hmun khata awm khawm phal a ni lo va, pawn chhuak tur reng rengin tha taka hmui tuam zel tur a ni. Zan dar 7 atanga zing dar 4 inkarah COVID-19 kaihhnawiha duty leh DC-in phalna a pek ni lo tu mah khawlai chhuah phal a ni lo bawk.