No.1557/2020-2021

Vawiin khan Lunglei District Level Task Force on COVID-19 chu an Chairman Lunglei DC Pu V.Lalsangliana hovin Lunglei DC Conference Hall-ah an thukhawm a.  COVID-19 vanga inkharkhip thawh ngana kalpui dan tur an sawi ho.

Chairman Pu V.Lalsangliana chuan COVID-19 avanga inkharkhip thawh ngana, June ni 1 atanga June 30, 2020 chhunga kalpui chhunzawm dan tura state sawrkar atanga ruahmanna awmte a sawi fiah a. Hemi ruahmanna bawh zui dan tur leh a hlawhtlin theih nana hma lak dan tur hrang hrang te, COVID-19 laka him tura Lunglei District chhunga chet lak chhunzawm dan tha ber tur te ngaihtuah ho a ni. 

District Bawrhsap chuan official-te, VLTF-te, tlawmngai pawl hrang hrangte Covid-19 do kawnga an thawhrimna leh inpekna avangin an chungah lawmthu a sawi a, kohhran 20 zet Community Quarantine Centre-a hman theiha awm chu lawmawm a tih thu a sawi bawk. Hmun hrang hranga Mizoram mi leh sa tangkhangte an rawn haw belh mek zel avangin kan fimkhur zual sauh a pawimawh takzet a ni tiin Lunglei Bawrhsap chuan sawrkarin tih tur leh tih loh tur a tih te tha taka zawm tlat turin mipuite a chah nawn leh a ni.

Lunglei CMO Dr Thani Pachuau chuan hmun hrang hrang atangin Mizoram mi leh sa tangkhangte an rawn haw mek a, Red Zone atanga rawn haw te pawh an awm mek avangin Covid-19 laka kan him tlan  theih nan tun hi fimkhur tul hun lai ber a ni, a ti bawk.  Indian Council of Medical Research Guidelines angin National Health Mission, Mizoram hmalaknain Civil Hospital, Lunglei-ah Biosafety Level-2 laboratory ah COVID-19 sample test-na atana hman turin Molbio Truenat khawl 2 hman mai theih turin kar hmasa khan bun a nih thu a sawi a. Truenat Covid-19 test hi ICMR-in RT-PCR tluka rintlaka a ngaih a ni a, he khawl hi quality run pass leh ICMR a registration tih fel anih hunah COVID-19 test na atan hman theih a ni dawn a ni tih a sawi.

Inkharkhip thawh nganaah hian a hma aia inthlah dulna lai awm mah se, sawrkarin zawm tur dan a zamte chu khauh taka ken kawh a ni dawn a. He thut khawmah hian inkharkhip kalpui mek atanga thlak danglam awmte inhrilhfiah a ni.

DLTF chuan inkharkhip thlah dul a nih avang hian COVID-19 hi a hlauhawm ta lo tihna a nih loh avangin mipuite chu fimkhur reng tur leh tul bik tak tak lovah chuan pawn chhuah tum lui lo turin a ngen a. Kum 65 chin chung lam te, taksa hriselna lama harsatna nei sa te, nau pai te leh naupang kum 10 hnuai lam te chu mahni inchhunga inkharkhip tha leh zual tura chah an ni.

 Inkharkhip thawh ngana kalpui chhung hian khawlaia mihring inhnaih chilh loh (social distancing) chu zawm zel tur niin, mi panga aia tam hmun khata awm khawm phal a ni lo va, pawn chhuak tur reng rengin tha taka hmui tuam zel tur a ni. Zan dar 7:30 atanga zing dar 4:30 inkarah COVID-19 kaihhnawiha duty leh DC-in phalna a pek ni lo tu mah khawlai chhuah phal a ni lo bawk.

Lunglei District-ah hian tun dinhmunah mi khunghran (quarantine) 571 an awm mek a. Hengte hi sawrkar Quarantine facility ah mi 333, mahni ina home quarantine 89 leh Community Quarantine Facility (kohhran hall) -ah mi 149 an ni. Quarantine facility hi a zavaiin 41 niin hengte hi sawrkar quarantine facility 21 leh Community Quarantine Facility (Kohhran hall) 20 te an ni. Tuna khunghran mek te hi Delhi, West Bengal, Telangana, Maharastra, Assam, Nagaland, Chhattisgarh, Uttarakand, Gujarat, Rajasthan, Andhra Pradesh, Karnataka, Madhya Pradesh, Haryana leh Uttar Pradesh atanga lo haw te an ni a. Tangkhang rawn haw belh turte dawl zo tur Quarantine Facilities tur ngaihtuah mek zel a ni a, hetih lai hian rawn haw tur zat hi a danglam ve zel avangin district thuneitute chuan a tul angin ngaihtuahna an seng zel bawk a ni.