1027/2022-2023
Lunglei the 23rd, June' 2022 : Vawiin chawhnu khan naupang kum 5 hnuailam kawthalo vanga thihna a tlem theihnan Intensified Diarrhoea Control Fortnight (IDCF) 2022, 23rd June - 7th July chhunga hmantur chu Govt. Chanmari Primary School II, Lungleiah hawnna hun hman a ni. Lunglei Bawrhsap Pu Kulothungan A, IAS chuan khuallian niin a hmanpui. Kumin IDCF thupui chu kawthalo avanga naupang thihna tihbo a ni

IDCF hawnna hun hi Dr. Lalrinthangi, SMO, Lunglei chuan kaihruaiin khuallian Pu Kulothungan A chuan India ramah kumtin naupang kum 5 hnuai lamah mi singruk velin kawthalo avangin an thih phah thin a, hemi pumpelh nan Ministry of Health & Family Welfare, Govt. of India kaihhruaina hnuaiah Intensified Diarrhoea Control Fortnight hman thin a ni a, Lunglei District ah kawthalo avanga thihna awm loh nan hma la tu khawtin leh vengtina Health Worker leh ASHA ten ngaipawimawh theuh turin a chah a ni. Naupang te pawhin kawthalo laka an invennan tui thianghlim in turin leh kut fai taka sil theuh turin a chah a ni.

Lunglei District chhunga SDC/CHC/PHC/MC ah naupang kum 5 hnuailam target 14655 te hnenah ORS packet 60000 leh Zinc tablet mum 70000 pek tura ruahman a ni a. IDCF chhung hian ASHA ten an bial theuh ah home visit an nei ang a, naupang kum 5 hnuailam awmna in ah naupang pakhat tan ORS packet khat zel an sem ang a, ORS siamdan leh kawthalo chungchang zirtirna an pe bawk ang. IDCF chhung hian SDH/CHC/PHC/SC leh Aganwadi Centre ah ORS-Zinc corner siam theuh a ni a. Lunglei District chhunga Primary leh Middle School zawng zawngah kut silfai dan, kawthalo enkawl dan zirtirna leh entirna neih a ni bawk ang.