1026/2022-2023
District Level Narco Coordination Centre (NCORD) Committee, Hnahthial District chu vawiin khan an Chairman leh District Bawrhsap ni bawk Pu R.Lalremsanga kaihhruaiin DC Conference Hall-ah an thukhawm a, ruihhlo leh a kaihhnawih thila hmalakna tur hrang hrang an sawi ho.

Meeting kaihruaitu District Bawrhsap Pu R.Lalremsanga chuan Mizoram-ah ruihhlo a hluar nasat thu leh Hnahthial District ah ngei pawh thalai engemaw zat a tih buai mek thu sawiin "Ruihhlo hian sualna hrang hrang a ken tel avangin ram leh khawtlang a ti ralmuang lovin a do hnathawh hi mitin mawh a ni" tiin ruihhlo do kawngah theihtawp chhuah turin Committee member-te a sawm a ni.

Superintendent of Police Pu Lalbiakkila chuan Hnahthial District chu Myanmar nena ramri intawm Kilometre 36 chuang nei a nih avang leh Hnahthial District ah police te mamawh anga tam an awm theih rih loh avangin Thingsai-ah bak Check gate mumal a awm lova No.4 tawlhluhna kawng awlsam tak niin hriat a nih thu a sawi a, Police ten Operation nei thin mahse man erawh an ngah lovin tunhnai khan Heroin gram 502.47, local market-ah Rs.14 lakhs man hu vel chu man a nih thu a sawi bakah kalkhawmte chu Police te thawhpui tur leh thurawn pe thin turin a ngen bawk a ni.

Drug hmang sualtute zingah HIV leh Hepatitis a hluar thu Dr.Lalrengpuii Ralte Medical Officer chuan sawiin District Hospital Hnahthial huamchhungah 2021 - 2022 chhung khan HIV Positive mi 48 an awm tawh thu leh kum 18 - 32 inkarah Hepatitis B leh C hmuhchhuah an awm nual thu a sawi bawk a ni.

Meeting-a kalte chuan Border ven uluk a ngaih thu leh Excise & Narcotics Deptt mamawhna a san thu te sawiin Zirna In hrang hrangah Anti drug awareness campaign neih nise an ti a, Ruihhlo zuar leh tawlh thin nia hriatte chhinchhiahna felfai tak neih nise, Ruihhlo dona atana hmanraw mamawh ang te pawh a tul angin ngaihtuah chhunzawm nise an tih bakah Jehova Jire Camping Centre Hnahthial chu hun remchang hmasa-ah Committee member-te hian tlawh nise an ti bawk a ni.