950/2025-2026

Lunglei, 2025 Nikir thla ni 26: Vawiin, June ni 26 hi khawvel pum huapa damdawi hman sual leh tawlh ruk dona ni, "International Day Against Drug Abuse & Illicit Trafficking" a nih angin tukin khan Lunglei District Ruihhlo Do Campaign hnuaiah Lunglei khawpui chhungah ruihhlo do kawng zawh, 'Walkathon: Walk Against Drug Abuse' buatsaih a ni.

Lungleia ruihhlo do kawng zawhah hian sawrkar department hrang hranga thawktute, Young Mizo Association (YMA) leh Village Defence Party (VDP) member-te, pawl hrang hrang ai awhte, kohhran ṭhalai pawl ai awhte, Govt High School Lunglei, Baptist Higher Secondary School Serkawn leh Govt J. Buana College zirlaite leh NCC cadet-te leh mipui ṭhahnem tak an tel a. Hmun hnih aṭanga kawng zawh niin, Kikawn aṭanga kal chhuakte chu District Bawrhsap Pi Navneet Mann chuan vai liamin, a ho va; AOC kawn aṭanga kawng zawhte chu Superintendent of Police Pu J. Lalmuankima'n vai liamin, a ho thung a. Lunglei Venglaia Old Tennis Court hmunah intawk khawmin, inkhawm tawi buatsaih zui a ni.

He ni puala inkhawm hi Lunglei District Social Welfare Officer Pu CL Joseph chuan a kaihruai a. Lunglei Sub-Divisional Officer (Sadar) Pi TT Beikhaizi chuan International Day Against Drug Abuse & Illicit Trafficking 2025 pualin zirlaite zingah inzirtirna leh intihsiakna hrang hrang buatsaih a nih thu sawiin, ruihhlo chu mi dang hmuhsit nihna leh mahni insitna thlentu a nih avangin a laka inthiar fihlim leh tihtak zeta do a ṭul thu a sawi a. Sawrkar department hrang hrang bakah, YMA, VDP leh kohhrante'n ruihhlo dona kawnga theih tawp an chhuah ṭhinnaah lawm thu sawiin, theih tawpa sawrkar thawhpui zel turin a sawm a. Ruihhlo laka fihlim turin tem chhin loh a pawimawh thu sawiin, ruihhlo ti lo tur leh a zawrh leh tawlh ruk kawngah pawh inhnamhnawih lo tura intiam thar ṭheuh turin kal khawmte chu a chah a ni.

Excise & Narcotics Assistant Commissioner Pu B. Ngurchhuana chuan kum 2025 atana ruihhlo hman leh tawlh ruk dona ni thupui, "Breaking the Chains: Prevention, Treatment, and Recovery for All" (Ruihhlo khaidiat chhut chah: mi tin tana invenna, enkawlna leh tihdamna) tih hmangin ruihhlo do tura ram mipuite fuihna thu a sawi a. Lunglei District Superintendent of Police Pu J. Lalmuankima chuan VDP unit zinga kawng zawha thawk chhuak ṭha ber - Ramthar Unit hnenah lawmman hlanin, lawm thu sawiin hun a khar a ni.

Khawvel ram hrang hrang inzawm khawm pawl, United Nations (UN) bul tumin kum 1989 aṭang khan kum tin June ni 26 hi "International Day Against Drug Abuse & Illicit Trafficking" atan hman niin, khawvel pum huapa ruihhlo hman khawloh leh tawlh ruk do ni leh a ṭhat lohzia inzirtir ni atan thupui thlan bik nen hman ṭhin a ni.

Attachment

  • Loading attachment...