949/2025-2026

Dated Saitual, the 26th June, 2025 : Vawiin chawhma khan Information & Public Relations (I&PR) leh Mizoram Journalist Association (MJA) tangkawpina an buatsaih, Media leh Mizo tawng chungchang zir hona hun - "Media Workshop" chu Saitual DIPRO pisa-ah hman a ni a, he Workshop hi Pi  F. Zodingpuii, DIPRO chuan a kaihruai. 

He hunah hian Pi F. Zodingpuii, DIPRO chuan kalkhawmte hnenah inlawmna thu a sawi a, hun hman a nih chhan te a sawifiah nghal a ni. MJA member kalkhawmte chu print media mai bakah tunlai thiamna hmang tangkai thiam turin DIPRO chuan a chah a. Tawng humhalh nan tan la zel tura fuihin chumi tur chuan MJA member te chu an pawimawh lehzual a ni, a ti a, MJA te nen inpawh taka an thawhonna chu chhawm nun zel a duh thu leh an hun hman chu an tangkaipui ngei a beisei thu a sawi bawk.

DIPRO chuan khawvel changkang zelah nu leh pa ten an fate sap tawng thiam tura an duh luatah Mizo tawng an hlamchhiah ang tih a hlauh thu a sawi a, social media, chhungkua leh nitin kan hun hmannaah Mizo tawng humhalh a, tawng dik hman uar chu mipuiten an mamawh tak zet a ni, a ti.

Hun hmannaah hian “Traditional Media and New Media”-Pu Vanneihtluanga ziah leh “Mizo Tawng ziah dan dik” - Dr. H. Laldinmawia ziah te chu Pu Isaac Lalrinfela leh Pu C. Rammawizuala MJA Saitual te kaihhruaina hnuaiah zirin, thupui zirhona atang hian hmasawnna tur hrang hrang kalkhawmte atangin sawiho a ni bawk.

Vawiin hi International Day Against Drug Abuse & Illicit Trafficing 2025 a nih vangin kalkhawmte hian ruihhlo dona thutiam (NMBA Pledge) sawi rualin, inkhawm hi tih tawp a ni.