2868/2025-2026

Lunglei, 2026 Pawlkut thla ni 12: Lunglei District Information & Public Relations (I&PR) Office-a thawkte leh Mizoram Journalists' Association (MJA) Lunglei District member-te chuan vawiin khan Lunglei DIPRO hna thawh pindanah kum thar 2026 atana inhlan tharna hun an hmang.

Lunglei DIPRO Pu C. Lalhruaitluanga chuan hun kaihruaiin, kum 2025 chhunga Pathian hruaina avanga I&PR Office-a thawkte leh Lunglei District MJA member-te chhungkuaah harsatna liantham tawk an awm lo leh kum thar dam tlang taka an chuang kai thei chu lawmawm a tih thu a sawi a. Kum 2025 chhunga MJA-te leh media hrang hrangte nen thawh hona ṭha tak an neihah lawm thu sawiin, office-a thawkte leh media mite chu kum thar 2026-ah mahni zawn ṭheuhvah theih tawp chhuah a, an mawhphurhna ṭha taka hlen chhuak tura rilru inhlan thar turin a sawm a. Chanchinbu chhuah ṭhat kawngah te, mipuite tana thu ṭangkai chhuah kawngah te, social media hman dan ṭha mipui zirtir kawngah leh sawrkar khalh ngilna kawngah te, hmasawnna atana digital media hman ṭangkai kawngah te hma sawn zel tum turin MJA member-te chu chahin, I&PR leh sawrkar department hrang hrangte nen thawh hona ṭha chhawm nung zel turin a sawm bawk.

MJA Lunglei District President Pu H. Lalthansanga pawhin thu sawiin, kum thar atana mahni zawna rilru ruahmanna an neihte a hlawhtlinna chu an kuta awm a nih angin theih tawp chhuah tlang turin kal khawmte a sawm a. Social media hrang hranga mi en hlawh duh avanga thu dik lo leh belh chian dawl lo, thil ṭangkai lo theh darh ang chi chu MJA member leh journalist pangngaite tan tih a thiang ve lo tih sawiin, news rin tlak bik siam leh digital media hman kawngah pawh mi dangte aia rin tlak bik nih tum a pawimawh thu a sawi a. Journalist-te leh I&PR Office-a thawktute ṭha taka thawk ho zel turin insiam rem thiam zel a ṭul thu te, mahni hriat zawng leh thiam zawngah mi dang kaihhruai leh zirtir peih a pawimawh thu te sawiin, an hna chu ram leh mipui rawng bawlna a ni tih hriaa kum tharah fimkhur taka kal turin I&PR-a thawkte leh MJA member-te a sawm.

Lungleia I&PR Office leh District MJA kum thar inhlan tharna hunah hian MJA member Pu H. Vanlallawma chuan hunserh hmangin, thuchah a sawi bakah, Pathian hnenah a ṭawngṭai a. Kal khawmte aṭangin thu sawi hrang hrang ngaihthlak ni bawkin, kum thar thingpui ruai kil ho a ni bawk.

Lunglei District I&PR Office hian kum 2025 chhung khan Lunglei District-a sawrkar chet velna hrang hrangah thuchhuah (press release) 592 (Mizo PR 531 & English PR 61) an siam a. News tur thlalak leh video pangngai bakah, a hranpaa theh darh tur video reels 83 leh flyer/poster 89 siamin, social media hrang hrang kal tlangin theh darh a ni a. Lunglei DIPRO Instagram account-ah kum 2025 chhungin post 740 siamin, chanchinbu kal tlangin sawrkar advertisement 38 (classified 30 & display 8) an pe chhuak bawk a. Lunglei District MJA-ah hian member 19 awm mekin, an zinga 18 chu accredited journalist an ni.