2869/2025-2026

Saitual, the 12th January, 2026: Vawiin khan DC Conference Room, Saitualah District Disaster Management Authority (DDMA) chu an chairman Dr. Lalngura Tlau, District Bawrhsap ni bawk kaihhruainain 15th January, 2026-a Saitual District-a State Level Mock Exercise on Earthquake in Mizoram kalpui dan tur relin an thukhawm.

He hunah hian DDMA Chairman Dr. Lalngura Tlau chuan thu sawiin, chhiatna lo thlen thulha chet lak dan tur nunchan zirna (Mock Exercise) chu a pawimawh hle a ni, a ti a, chhiatna a lo thlen tak tak huna mi tanpui dan thiam nan te a tangkai hle a ni, a ti bawk.

Dr. Lalngura Tlau chuan lirnghing chuan khuarel chhiatna dangte aiin thihna a thlen tam zawk thin, a ti a, Mizoram chu lirnghing thlen theihna seismic zone V-a awm kan nih angin lirnghing lo thlen thulha chetlak dan inzirtir hi a pawimawh hle tih a sawi bawk. Bawrhsap chuan khuarel chhiatna tawh changin YMA te chu a che chhuak hmasa ber te an ni thin tih a sawi a, tlawmngai pawl tha tak Mizoramin a nei chu vanneihthlak a tih thu sawiin, Mock Exercise-ah pawh tel ve ngei se a duh thu a sawi. Mock Exercise-a chanvo nei zawng zawng te chu theih tawp chhuah turin Bawrhsap chuan a sawm nghal bawk a ni.

Mock Exercise hi hmun thuma neih tura ruahman niin chhun lamah Govt. Saitual College-ah leh Market Shed, Keifang Bazarah neih a ni ang a, zing dar 9 atanga chawhnu dar 1:30 thleng neih tur a ni. Zan lam hi Market Shed, Keifang Mel Venga neih tura ruahman niin, tlai dar 4:00 atanga dar 6:30 thleng neih tur a ni a, hei bakah hian Command centre leh Operation Centre a awm bawk ang. Hemi ni atan hian site tina duty turin Incident Commander leh Responsible Officer ruat an ni bawk a ni.

Vawiin thutkhawm hi Dr. Lalngura Tlau, DDMA chairman leh DC ni bawkin a kai hruai a, DDMA member te telin, Mock Exercise atan mawhphurhna pek theuh an ni.