4791/2025-2026

Lunglei, 2026 Vau thla ni 11: Nimin khan Lunglei District Water & Sanitation Mission (DWSM) chu an Chairman, District Bawrhsap Pi Navneet Mann hovin Lunglei DC Conference Hall-ah an ṭhu khawm a. March ni 8–22, 2026 chhunga chawlhkar hnih awh Tui Kut, "Jal Mahotsav" (Water Festival) leh vantlang thawh hona kal tlanga tui khawl leh humhalh tura hma lakna, "Jan Bhagidari Campaign" hawnna hun an hmang.

Chairman Pi Navneet Mann chuan tui renchem, tui hna humhalh leh tui hna tipung tura hma lakna hrang hrangah mipuite ṭhan harh leh ṭan rual a pawimawh thu a sawi a. Sawrkar kuta innghat ringawt lo va, vantlang thawh hona kal tlanga tui khawl leh humhalh tura hma la turin District mipuite a sawm.

Lunglei DWSM Member Secretary, PHED Lunglei Rural WATSAN Divison-a Sr Executive Engineer Dr ZR Ṭhasangzuala chuan report tlangpui tar langin, Jal Jeevan Mission (JJM) Lunglei hnuaiah chenna in, zirna in leh anganwadi centre tinah tui herh haw mai theihna, 100% FHTC (Functional Household Tap Connection) vuah a nih tawh thu a sawi.

Jal Mahotsav leh Jan Bhagidari Campaign kalpui chhung hian thingtlang khaw tinah tui hnianghnar leh tui hna ṭha leh tlo a awm theih nana inzirtirna kalpui tur niin, hemi atana khaw tina Village WATSAN Committee (VWSC)-te pawimawhna leh mawhphurhnate inzirtir thar a ni dawn a. Tuizem leh tuikhuah siam leh enkawl kal tlanga tui awm sa humhalh leh renchemna tur leh lei hnuaia tui hna tipung tura hma lak tur niin, mipui tui mamawhna phuhru tur leh tui hna tipung tura sawrkar, sumdawng, tlawmngai pawl, khawtlang thuneitu leh mipuite thawh honaa hma lak chu he campaign hian a tum a ni.

He ṭhut khawmah hian PHED official-te'n Lunglei District chhunga sikul, anganwadi centre leh damdawi in hrang hranga tui an hnianghnar dan lo zir chiangin, Deputy Commissioner hnenah an zir chianna theh lut se, tih a ni a. Gram Sabha-a VWSC-te telh an nih theih nan RD Department-ah ngenna thlen ṭha tih a ni bawk a. Member kal khawmte'n Jal Mahotsav Pledge an sawi rual bawk.