4790/2025-2026

Aizawl; the 11th March, 2026: Vawiin  chawhnu khan Aizawl DC Pisapui Hall-ah Aizawl DC office buatsaihin Bana kaih ( Hand holding) scheme hnuaia CM's  Special Package  Grant phase -II semna leh briefing Programme hman a ni a.  Pi Baryl Vanneihsangi,Aizawl south -III bialtu MLA chuan khuallian niin  hun a hmanpuia, CM’s special package  grant phase-II , progress partners te hnenah certificate leh Sign Board a sem nghal bawk a ni.

He hunah  hian thu sawiin, Pi Baryl-i chuan mihring hi mithiam te sawi danin, kan ngaihtuahna 70% aia tam luahtu   hian min kaihhruai thin a. Chuvangin vawiina progress partners te  chuan ‘kan sum dawn hi a tam lem lova,  engmah kan ni pui lovang’ tih zawnga ngaihtuahna kal tir lova, he tanpuina sum kan dawn hi tam lua lo mahse, engemaw zawng tal chuan kan hlawhtlinpui ngei ang’ tih zawnga ngaihtuahna in sen chuan in hlawhtlinpui ngei ka beisei tlat a.  CM’s Special package diltu tam tak zingah,  sawrkarin hlawhtlinna kawng zawh dun pui tura a  rin ngam progress partners thlanchhuah te in ni a, rinawmna, chhelna leh taimakna nen he tanpuina sum hi  a hmanna tur dik taka hmanga;  hlawhtlin pui ngei turin ka chah che u a, duhsakna ka hlan bawk a che u, a ti.

Vawiin  programme hi Zoramsiama Hmar,Addl.DC in kaihhruaiin,  Aizawl bawrhsap Er.Lalhriatpuia'n  keynote address sawina hun a hmang a. Pu Lalnghakliana, Research Officer in   CM’s Special package grant Phase –II  tanpuina  dawngtu tur  Progress partners te  thlanchhuah dan leh Progress partner te hriattur pawimawh hrang hrang sawina hun a hmang bawk. Vawiin programme-ah hian  Aizawl district chhunga   implementing department head of Office 4: DCIO, DVO, DHO leh DFDO ten an hmalak tawhna leh monitoring kalpui dan tur te report an pe  a. Progress partners te nen interaction  session hman nghal a ni.

CM’s Special package grant Phase-II progress partners te Department pali atanga thlan an ni a, Commerce & Industries Dept. atangin mi 58, AH& Vety Dept.  atangin mi 58, Horticulture Dept. atangin mi  8 leh Fisheries Dept. atangin  1  te an ni a. Tanpuina sum hi  installment a pe lovin, a vaiin vawikhatah  DBT  in  Progress partner te  Bank account-ah  thunsak vek an ni ang.  Progress partner  pakhat hnena  tanpuina sum  pek hi  ₹50,000 aia tam lo theuh a ni.

 Vote of thanks sawiin Pi Laldinpuii DCIO in vawiin programme hi a kharta a ni.