4356/2025-2026

Lunglei, 2026 Ramtuk thla ni 9: Vawiin khan Lunglei District Level Committee on Fire Prevention (DLCFP) huaihawtin Kangmei Ven Chawlhkar (Fire Prevention Week) 2026 hawnna hun chu Lunglei Convention Centre-ah hman a ni a. Lunglei District Superintendent of Police Pu J. Lalmuankima chu Khuallian a ni.

Khuallian Pu J. Lalmuankima chuan India leh khawvel ram hrang hrangte'n ramngaw ṭha an ngaih pawimawh hle laiin Mizoramah ramngaw dur, ngaw chhah ṭha a tam tawh lo hle tih sawiin, ramngaw humhalhna kawngah ṭan lak a ṭul thu a sawi a. Kangmei tihchhuah chu ramngaw tihchereuna lian ber a nih avangin kangmei ven a pawimawhzia sawiin, kangmei vanga chhiatna tam tak chu fimkhurnaa pumpelh theih a nih thu a sawi a. Ramngaw chu nungchate chenna hmun, boruak thianghlim leh tui thianghlim min petu a nih bakah, sawrkar laipuiin state tinte pawisa dawn tur zat (10%) tehfung atan an ramngaw neih ṭhat dan a chhut tel avangin thing leh mauvin sum a hlawh chhuak tih hriat a, ramngawte chu kangmei leh a chereu theihna dang laka ven him a pawimawh thu a sawi a. Kangmei chhuak chuan ramngaw a tihchhiat bakah, a tikangtute chu thubuai siamsak ṭhin an nih thu sawiin, buaina leh harsatna pumpelh turin kangmei laka fimkhur tlan a pawimawh thu a sawi a. Kal khawmte chu kangmei ven pawimawhna zau zawka inzirtir leh puanzar kawnga ṭan la tur leh dan bawhchhia an awm chuan thuneitute hnena thlen vat ṭhin turin a sawm.

"Nungchate chenna leh tui thianghlim min petu ramngaw kangmei lakah veng him rawh" tih thupui hmanga February ni 9 — 13, 2026 chhunga Kangmei Ven Chawlhkar hman tur hawnna hun hi Lunglei Election Officer Pi Lalhruaitluangi chuan kaihruaiin, inlawmna thu a sawi a. Chairman kaihhruaiin mipui kal khawmte chuan kangmei tichhuak lo tura intiamna an chham rual a. DLCFP Member Secretary, Environment, Forests & Climate Change (EF&CC) Lunglei Divisional Forest Officer Pi Lawmnapari chuan kum hmasa lama Lunglei District-a kangmei venna kawnga hma lak dan tlangpui tar langin, Lunglei District Village Council Association President Pu V. Lawmkima hnen aṭangin thu sawi ngaihthlak a ni bawk.

He hunah hian sawrkar official-te, village/local council leh tlawmngai pawl ai awhte, MJA leh zirlaite an kal khawm a. Power & Electricity (P&E) Lunglei Power Maintenance Division-I aṭangin Junior Engineer Pu Lalawmpuia leh Fire & Emergency Service, Lunglei aṭangin Station Officer Pu T. Lalchhandama te'n PowerPoint presentation hmangin kangmei laka fimkhurna tur hrang hrang an sawi a. Kangmei chhuah thulhah state fire emergency number 112 bakah, Lunglei Fire & Emergency Service landline number — 0372-2325366 emaw, 0372-2324101 emaw, mobile number 8794889383 emaw kal tlangin biak pawh theih an nih thu tar lan niin, kangmei chhuah thu report-tute'n kangṭhelh motor tana kalkawng awlsam ber te, kangmei chhuah chhan leh eng nge kang tih te leh thil pawimawh tur te sawi tel nachang hriat a pawimawh thu tar lan a ni bawk.

Kumina Kangmei Ven Chawlhkar hman chhung hian Lunglei District chhungah kangmei venna lam inzirtirna (awareness campaign) uar zawka kalpui turin VC/LC leh tlawmngai pawlte nen thawk hovin department lamin hma an la dawn a. Media kal tlanga sawi hona, thuchah leh inzirtirna hrang hrang tihchhuah te, kohhran inkhawma thu puantir te, vantlang tlangau hmanga inzirtirna puan leh intihsiakna hrang hrang buatsaih te tum a ni a. Kangmei ven kawnga thawk ṭha khuate chawimawina 'Village Level Fire Prevention Award 2026' pawh siam leh tum a ni.

Fire Prevention Week hi Mizoramah kum 2000 aṭang khan hman ṭan niin, kumin hi a ṭum 27-na a ni a. Kum 2009 aṭang khan district leh village level fire prevention award sem ṭan niin, kumin pawh hian award hi sem leh tum a ni.

DLCFP Member Secretary report-a a lan danin, nikum khan Lunglei District chuan Mizoram district hrang hrang zinga kangmei veng ṭha ber, District Level Fire Prevention Award 2025 lawmman pakhatna lain, Lunglei District chhunga Village Level Fire Prevention Award 2025-ah pakhatna Lungsen-I, pahnihna Mualcheng South leh pathumna Mualṭhuam North an ni a. Kum 2025 chhung khan VC/LC leh YMA te nen ṭang tlangin ram kang/kangmei ven chungchang inzirtirna kalpui ṭhin niin, sawrkar pisa hrang hrangah kangmei veng tur leh fimkhur tura intiamna sawi rual a ni a; hmun pawimawh leh langsar laiah te inzirtirna thuziak tar niin, kohhran hun hmannaah thu chhiar chhuah tur te pek a ni a. Print/electronic/social media kal tlang te'n inzirtirna hrang hrang theh darh a ni bawk a. Lunglei District-a kangmei tichhuaktu mi 33 lakah court-ah thubuai ziah luh niin, dan angin an chungah hma lak a ni bawk.