3130/2024-2025

2024 Sahmulphah thla ni 21: Vawiin khan Lunglei District Bawrhsap Pu R. Lalṭhazuala hovin Lunglei DC Conference Hall-ah Lunglei khawpui helna kawng (bypass road) sial tura ruahmanna sawi ho a ni.

Bawrhsap chuan kal khawmte lawmna thu sawiin, Lunglei khawpui helna kawngpui ṭha neih chu khawtlangin kan vei tlang a, a puitlin hlan pawh a nghahhlelhawm tawh hle a ni, a ti a. NHIDCL leh PWD lam aṭangin a kal khan ṭha deuh nia ngaihte pawh lo riruat lawk tawh a ni nain, kawng kalna tur thlan fel hnuah DPR siam a, Ministry of Road Transport & Highways)(MoRTH)-ah pawmpui tura theh luh theih chauh tur a la nih thu sawiin, a kawng la thui viau mah se, a pawimawh lai ber a nih avangin kal khawmte chu Lunglei khawpui tana ṭha ber tura ngaihtuahna seng tlang a, ruahmanna siam turin a chah a ni.

He hunah hian Lunglei North bialtu MLA ai awh te, Lunglei Municipal Council (LMC)-a Ward No. I Councillor Pi Lalhruaitluangi Sailo te, sawrkar department hrang hrang official-te, NHIDCL lam te, District MJA, Joint Local Council leh Sub-Headquarters YMA president ṭheuhte, Pukpui, Zotlang, Rahsiveng leh Sazaikawn local council chairman-te leh YMA president-te an tel a. Lunglei bypass road atana NHIDCL lamin kawng kalna tur (alignment) an ruahman chhin pali leh PWD lam aṭanga ruahman chhin pahnih chu thlir ho a ni a. Lunglei khawpui chhung lirthei tlan tihzangkhai dan tur te, mipui tana awlsam, zangkhai leh mipuiin an chhawr theih dan tur te, ei leh bara hmasawnpui theih tur te, leilung leh chhehvel tana him tur te, ram lak leh kawng siamna senso tur leh nghawng a neih tur hrang hrangte thlir chungin rawtna hrang hrangte hi sawi ho a ni a. Lunglei mipui tana ṭha, awlsam leh ṭangkai ber tur nia ngaih, NHIDCL option 2 milin, PWD lam leh kal khawm member-te'n rawtna an neih hrang hrang rin lut telin, Detailed Project Report (DPR) chu ruahman ni se, tih a ni a. Kawng ṭha leh tlo a awm theih nan leivung paihna tur leh leilung tana him tur ngaihtuah lawka ruahmanna siam tum ni se, tih a ni.

Kawng kal dan tur riruang duan lawk dan chuan, Lunglei bypass road hi Tlawng lei chhak, Saza Bangla chhak deuhvah kawng pangngai aṭanga pengin, tlak lam zai zaiah fual deuh hlekin Lunglei khawpui a hel ang a, Sazaikawn kawng peng ṭhuam laiah a chhuak phei dawn a. A pen ṭanna aṭanga a tawp thleng hian km 21.55 vela thui ni tura ngaih a ni.

Attachment

  • Loading attachment...