Vawiin chawhma dar 11:00 khan Saikuti Hall-ah Lungleia a vawikhatna atan, a huhoa Khawvel Upate Ni, World Old Age Day lawmna chu Mizo Upa Pawl (M.U.P.) Hqrs, Lunglei chuan a buatsaih a. Social Welfare Minister Pu P.C. Lalthanliana chu Khuallian a ni.

Pu PC Lalthanliana chuan khawvel pum huap Ni te kan hmang thin a, Upate Ni kan hmang hi thil duhawm tak, upate zahna lantirna a ni, a ti a. Upate chu upat avanga chawl mai hman in ni lo tiin; chhungkua, khawtlang leh ram tan tih tur tam tak inla nei a ni, a ti. Ram hmasawn nan sawrkar, tlawmngaipawl leh kohhran te lungrual taka an kal a pawimawh a, hemi atan hian MUP ten dinhmun pawimawh tak in luah a ni, a ti. Minister chuan Mizote hian ngaihsan leh chawimawi phu te kan hrelo ang tih ka hlau, a ti a. Kan hnam hian chawimawi tur dik a hriat hunah chuan a puitling lehzual dawn a ni, a ti.

Khuallian chuan Mizoram pawhin upate hamthatna tur dan leh dun fel tak a nei tiin, The Mizoram Maintenance and Welfare of Parents and Senior Citizens Rules, 2013 chu July ni 30, 2014-a pass a nih thu a sawi a. He Rules hmang hian sawrkar chuan upate tan hma a la mek zel a ni, a ti. Kum 2011 chhiarpuiah senior citizen (kum 60 chunglam) 49799 Mizoramah an awm tiin, chung zinga 25469-te chuan tar pension (old age pension) an lak mek thu a sawi. He programme-ah hian Lunglei District huamchhunga kum za tling mi 9-te hnenah lawmpuina a hlan bawk a ni.

Dr. Eric Zomawia, State Nodal Officer, NCD chuan upate tan natna inkaichhawn theih loh (non-communicable disease) chungchang zirtirna a nei a. MUP Hqrs buatsaih, Carrom inelna a tel te hnenah lawmman sem a ni bawk.

Pu Sanghlira Colbert, President, MUP Hqrs Lunglei chuan programme hi kaihruaiin, Vice President Pu B. Lalchungnunga’n lawmthu sawina in a khar a ni.