Vawiin chawhma dar 11:00Am khan Mizoram Upa Pawl, Sub Headquarter : Siaha District ten I&PR Conference Hall-ah Khawvel pum huap Upa te Ni vawi -24 na an hmang.

Vawiin MUP Day lawmna inkhawm hi Pu V.Lalchhawna, President MUP, Sub Headquarter: Siaha in a kaihruaia, Rev.Dr.T.Tumsanga’n hunserh ahman zawha khuallian Pu K.Hrahmo, CEM in-Charge MADC chuan thusawina hun a hmang.

Pu Hrahmo chuan thusawiin, Kan Upa te hi Ram leh Hnam ro hlu an ni a, Kum Upa kawl hnem ram apiang ram changkang leh ram hrisel, hnam fing an ni deuh tlangpui thin. Nelson Mandela leh Ronald Reagan te pawh keini in a Tar kan tih tawh tur kum 76 leh 69 ah President a thlan tlin an la ni chheu mai. Khawvela mihring damchhung hun hi a rei zel a, Kum 1947 –a India mi te Life Span chu kum 45 niin, tunah erawh chuan kum 65 a ni tawh a ni. Mizoramah pawh kum 50 liam ta a kha chuan Kum 60 chin atanga chuan Pitar-Putar kan tih tawh mai a, tunah erawh chuan Kum 60 a Upa te chu Nula –Tlangval tak an la ni. Chuvangin vawiin MUP member lo kalkhawm te hi kum 100 chuang I dam thei a, chumi atan chuan duhsakna ka hlan a che u, a ti.

Khualzahawm Pu N.Vabeiratlua, DIPRO pawhin thusawiin, Kum Upa te hi thangthar tan chuan Living Library in ni a, I tawnhriat thiamna leh Finna te hi thangthar te hnenah hlanchhawng hman lo va in awm hi Bible- a SAM ziaktu ang khan hlauh ve hle rawh u, a ti.

Vawiin Upa te ni lawmna hi Session hnih-a then a ni a, Session khatna-ah Khuallian leh Khualzahawm thusawina hun leh malzai te ngaithlak a ni a. Session hnihna-ah Pu F.Chhawnmanga’n “Tar Harhna” tih thupuia hmanga a Paper Present zirhona leh Lengkhawm hla zaihona te neih a ni.