2498/2026-2027

Lunglei, 2026 Khuangchawi Thla 2 :  Nimin, October ni 1, 2026 khan Lunglei Convention Centre-ah Lunglei District Social Welfare Office leh Mizo Upa Pawl (MUP), Headquarters Lunglei ṭang kawp huaihawtin Khawvel Upate Ni (International Day of Older Persons) hman a ni a. Lunglei District Social Welfare Officer Pu CL Joseph chuan Khuallian niin a hmanpui.

Khuallian Pu CL Joseph chuan kum tin October ni 1 chu khawvel upate ni atan khawvel hmun hrang hrang leh India ram chhungah pawh hman ṭhin a nih thu sawiin, he ni hi kum upate hna thawh hlu tak takte ngaihhlutna hun atan te, an zahawmna, dikna chanvo, hriselna leh hlimna te ngaihtuah chungin awmze nei zawka khawtlanga an tel ve theih nan hman ṭhin a nih thu a sawi a. Kum lama upa zawkte'n an vanglaia kohhran leh khawtlang tana theih tawp an chhuah azarah tun dinhmuna hmasawnna tam tak chu lo thleng a nih thu sawiin, tunah duhthusama an taksa a chak tawk tawh loh avangin an hahchawlhna tur Lunglei leh Hnahthialah Senior Citizen Day Care Centre din tura hma lak mek a nih thu a sawi.

Pu CL Joseph chuan Upa Pension latute harsatna sut kian nan Mizo ṭawngin website leh Android application, 'NSAP Puitu' siam a nih thu sawiin, District Social Welfare Office-a kal kher ngai lovin harsatna an neihte online-a thlen ṭhin turin kal khawmte a chah a. Harsatna an sawite chu ni 7 chhungin chhanna pek ṭhin an nih thu a sawi a. Upa Pension chu Direct Benefit Transfer (DBT) hmanga pek a nih tawh avangin an khuaa Bank Branch awm lote chu India Post Payments Bank (IPPB)-ah account hawng tura chahin, taksa chak loh avanga pawn chhuak thei lote pawh an inah ngei pension pawisa pek theih a nih thu a sawi bawk.

Khawvel Upate Ni lawmna hi MUP Headquarters Lunglei President Pu B. Lalchungnunga'n a kaihruai a. Rev. Saidawla, Farm Veng chuan hunserh hmangin, MUP Headquarters Lunglei Secretary Pu R. Rozika'n MUP chanchin leh hma lakna a sawi a. MUP member-te aṭangin zai, lam, rimawi tum leh item hrang hrang ngaihthlak leh thlir ho niin, infiamna leh intihsiakna hrang hrang nen hun hlimawm tak hman ho a ni a. Lunglei District Legal Services Authority (DLSA) aṭangin Advocate Pu C. Zokhuma'n dan lam hriat tur pawimawh hrang hrang zirtirin, MUP Unit Bazar Veng President Pu ZD Lalthlamuana'n "Mizo ṭawng dik i hmang ang u" tih thupui hmangin thu a sawi a. Member kal khawmte'n October ni 2-a hman ṭhin Khawvel Huap Tharum Thawh Loh Ni (International Day of Non-Violence) pual thutiam chham rualin, MUP Headquarters Lunglei Finance Secretary Pu V. Vanṭhuama'n lawm thu sawiin hun a khar.