3527/2022-2023

Lunglei the 9^th February 2023 :  Agriculture Technology Management Agency leh Horticulture Department Lunglei buatsaihin vawiin khan Horticulture Conference Hall ah Khuai khawi Training leh Khuai Bawm semna hun neih a ni a, Pu Lalrinsanga MHS, District Horticulture Officer in khuallian niin a hmanpui.

Training inkhawm hi ATMA Lunglei Project Director, Dr.V.Zodinsanga'n a kaihruaia ATMA Lunglei hmalakna hrang hrangte tarlangin Lunglei District bakah Hnahthial District an enkawl thu a sawi a, kuthnathawktute tan Programme an buatsaih ṭhin thu leh Khuai khawina Bawm pawh 65 lai an semchhuah tawh thu a sawi.

He huna khuallian Pu Lalrinsanga, District Horticulture Officer chuan ATMA te hian kuthnathawktute tan kawng hrang hrangin hma an la a an ṭangkai hle a ni  ti. Khuai khawi hi Agriculture leh Horticulture Department nen an inzawm tlat a Khuai hi kan Agriculture Product ah thil ṭangkai tak niin thlai chi inthlahchhawnna kawngah thawktu ṭangkai tak an ni a, kuthnathawktute tan chuan Khuai hi kan ṭhian ṭha tak a ni a ti. Hei bakah hian Khuai Zu chu sum hnar ṭha tak leh mihring tan damdawi ṭha tak a nih thu DHO Pu Lalrinsanga chuan sawi bawkin pangpar leh thlai hnah par chi awm tamna hmunah chuan Khuai khawi nachang hriat a ṭhat thu leh a remchan bik thu sawiin, Lunglei District ah pawh Khuai khawi lama hmalak nachang hria mi engemawzat an awm tawh chu lawmawm a tih thu leh theihtawp chhuah a midangte pawhin khuai khawi duhna thinlung an put theihna tura nasa zawka ṭan la zel tur leh an kal zelna turah Training an neih chu chhawr ṭangkai ngei tura a duh thu a sawi a ni.

Vawiina Khuai khawi Training ah hian Khuai khawi lama thiamna bik nei Pu Ramnghilhlova Theiriat in zirtirna a pe a Training a telte hnenah Khuai khawina Bawm a thlawnin pek nghal an ni bawk.