3526/2022-2023

Kolasib dated 9th February 2023: Vawiin chawhma khan DC Conference Hall, Kolasibah Chapchar Kut 2023 Organizing Committee chuan thutkhawmna neiin Pu John LT Sanga, Deputy Commissioner chuan a kaihruai a. Sawrkar office leh tlawmngai pawl hrang hrang hruaitute thutkhawmnaah hian Chapchar Kut 2023 lawmna hlawhtling tak a kalpui a nih theih nan mawhphurhna inhrilhhriatna hun hman a ni.

Thutkhawmna chuan Kolasib district mipui tam zawkin Chapchar Kut lawmna an chhim theih nan a lawmna chu Tumpui Field-ah buatsaih an rel a, Kut Pa atan Kolasib bialtu MLA Pu K.Lalrinliana, Minister, FCS&CA chu sawm ni se tih a ni. Stage Construction Sub Committee, Light & Sound Sub Committee, Refreshment Sub Committee, Sanitation Sub Committee, Traffic & Security Sub Committee leh Ushering Sub Committee-te din niin mawhphurtu tur te ruat a ni a. Chapchar Kut lawmna pual a thlalakna bik ‘Photo Booth’ siam te, Kolasib district Chapchar Kut Miss thlan chhuah te leh State thenawm nen a inlaichinna tha siam nan Hailakandi, Cachar leh Karimganj District Deputy Commissioner-te Kut lawmna a tel tur a sawm ni se tih rel a ni bawk.