4025/2024-2025

Lunglei, 2025 Pawlkut thla ni 30: Vawiin khan Lunglei DC Conference Hall-ah Lunglei khawpui huam chhunga Ṭhalai Kristian Pawl (TKP) pastor bial pathum - Bazar, Rahsiveng leh Theiriat hnuaia unit hrang hrang 14-a ṬKP hruaitute tan inkai chhawn theih loh natna (Non-Communicable Disease - NCD) chungchang inzirtirna, 'sensitisation programme' buatsaih a ni.

He hun hi Lunglei Sub-Deputy Commissioner Pi Lalhlimpuii Pachuau chuan a kaihruai a. District Immunisation Officer Dr Christina Zonunmawii chuan natna inkai chhawn theih loh (NCD) chungchang, a awmzia, a natna lan chhuah dan leh natna lo awm chhan bakah, NCD natna laka inven dan tur kawng hrang hrangte a zirtir a. Ṭhalaite'n nunphung hrisel an neih theihna tura hma lak dan tur kawng hrang hrangte zir ho leh sawi ho a ni bawk.

Healthy Lunglei District Campaign hnuaia sawrkar leh Mizoram Ṭhalai Kristian Pawl (MṬKP) ṭang kawpin hriselna inzirtir tura thawh hona an kalpui mekah pastor bial ṬKP pathum - Bazar, Rahsiveng leh Theiriat bial leh an hnuaia unit 14 te chu thlan niin, ṭhalai programme-ah a remchan danin hriselna lam hawi inzirtirna leh thil tih - zingkara kea kal, thla kipa infiamna hun huaihawt, kohhran/ṬKP chanchinbu leh social media kal tlanga hriselna lam hawi inzirtirna puanzar, member-te hriselna dinhmun endik, inzirtirna thuziak sem darh, intlansiak, thu inziahsiak leh hma lakna remchang ang ang an kalpui mek a. Natna inkai chhawn theih loh chungchangah awmze nei leh hlawk zawka hma an lak zel theih nan ṬKP hruaitute tana sensitisation programme hi buatsaih a ni.

Attachment

  • Loading attachment...