1712/2026-2027

Lunglei, 2026 Thlazing ni 10: Vawiin khan Lunglei District pum puiah kum 2026 atana rulhut hlo pek runpui thawh hnihna, National Deworming Day (NDD) 2026 Second Round kalpui a ni a. Government Bazar High School, Bazar Veng, Lungleia he ni puala a hawnna hun buatsaih chu Lunglei Sub-Deputy Commissioner Pu Deepak Godara, IAS chuan Khuallian nia hmanpuiin, zirlai naupang ṭhenkhat chu rulhut hlo (Tablet Albendazole) a eitir.

Khuallian Pu Deepak Godara chuan rilru chak leh lehkha thiam thei ni turin taksa hrisel neih a pawimawh thu leh zirna leh infiamnaa hlawhtling turin hriselna chu a bulpui ber a nih thu sawiin, taksa leh rilru hriselna tichhe theitu rulhut laka him turin zirlaite chu faina leh thianghlimna ngai pawimawh tur te, kut sil fai uar tur leh tui thianghlim chauh in ṭhin tur te'n a chah a. Zirlaite chu ram hma hun innghahna an nih avangin an hriselna ngai pawimawh tura chahin, hriselna atana palai rinawm tak ni tur leh thil ṭha an zir chhuahte chu an chhungte leh an ṭhiante hnena zirtir chhawng zel turin a chah a. Hma hun eng tak nei turin thawh rimna leh thu awihna a pawimawh thu sawiin, zirna leh an nun kawngah hlawhtling zel turin duhsakna a hlan bawk.

He hun hi Lunglei Child Development Project Officer (CDPO) Pi R. Lalhmingliani'n kaihruaiin, naupang kum 1–19 inkarte rulhut laka ven nan National Deworming Day chu India ram pumah kum tin ṭum hnih hman ṭhin a nih thu a sawi a. Lunglei District Education Officer Pu Micky R. Lalenkawla chuan PowerPoint presentation hmangin rulhut pai theih dan te, mihring tana rulhut ṭhat lohzia leh rulhut hlo ei a pawimawhzia te tar langin, rulhut pai lo turin kum khatah rulhut hlo vawi hnih tal ei a ṭhat thu a sawi a. Sawrkarin naupang kum 19 hnuai lam tan kum tin ṭum hnih a thlawna rulhut hlo a pek thu sawiin, naupang kum 2 hnuai lamte chu Albendazole mum chanve pek ṭhin an nih thu leh kum 2 leh 19 inkar chu mum khat pek ṭhin an nih thu a sawi.

Mizo Hmeichhe Insuihkhawm Pawl (MHIP) Sub-Headquarters Lunglei ai awh Pi Vanlalthangi Chhakchhuak chuan kut sil dan a taka entirin, naupangte a zirtir a. Lunglei District Information & Public Relations Officer Pu C. Lalhruaitluanga, Govt Bazar High School Headmaster Pu H. Lalramnghaka leh Govt Middle School, Bazar Veng Headmaster Pu V. Lalnunsanga te pawhin zirlaite fuihna thu sawiin, Lunglei District Immunisation Officer Dr Christina Zonunmawii'n lawm thu sawiin hun a khar.

NDD 2026 Second Round-ah hian Lunglei District chhungah kum 1–19 inkar rulhut hlo pek tur tinzawn 44,205 awmin, sawrkar sikul, mimal sikul leh anganwadi centre-ah te rulhut hlo hi pek vek tum a ni a. Vawiin khan District chhunga sikul, college leh anganwadi centre-ah rulhut hlo hi pek niin, sikul kai lote chu ASHA-te'n an inah kal chilhin an pe bawk a. Target zinga tel si, vawiina pek hman lohte pe kim tura thual nawn ni (Mop-Up Day) atan August ni 17 ruahman a ni.