1711/2026-2027

Kolasib, 10th August, 2026: Vawiin chawhma khan Diakkawn YMA Hall-ah Viksit Bharat - Guarantee for Rozgar and Ajeevika Mission (Gramin) (VB-GRAM-G) Act, 2025 hnuaia hmalakna tur hrang hrang leh dan kalhmangte zirhona leh inhrilhhriatna hun, 'Panch Sammelan' chu Kolasib District-a Village Council (Panchayati Raj Institution) hruaitute tan buatsaih a ni.

He hun hi Pu Lalmuan Puia, Project Director, DRDO chuan hawngin thu a sawi a. Project Director chuanPanch Sammelan chu VB-GRAM-G dan thar hnuaia hmalaknate khawtlang hruaitute nena a taka kalpui a nih theih nana inbuatsaihna pawimawh tak a nih thu a sawi. "He dan thar hian khawtlang hmasawnna tura kan ruahmannate a taka chantir turin thuneihna leh mawhphurhna lian tak min pe a. Chuvangin, VC te leh mipui aiawhten a kalhmang hi chiang taka kan hriat a, a hlawhtlin nana theih tawp kan chhuah ho a pawimawh hle a ni," a ti. He hun tha hi hmang tangkai a, ram leilung leh tui humhalh chungchangte, mipuite tana eizawnna leh hna siam chungchangte uluk taka zir turin kalkhawmte a chah bawk.

He inkhawm (Sammelan) hian a tum ber chu VB-GRAM-G danin a phut ang hmalaknate chu khawtlang hruaitute leh a thawktuten tha taka an kalpui  theih nana zirtirna pek a ni. Heta tang hian Village/Gram Panchayat Plan (VGPP) siam dan te, job card/guarantee sem chhuah dan te, tui humhalh leh khawtlang tana hmasawnna ruhrel din dante zirho a ni a.

Heng bakah hian Mipui tel ve na rorelna hmanga khawtlang hmasawnna hna reng reng fiah leh langtlang tak  leh mipui endik (social audit) hnuaia kalpui a nih theih dan turte pawh a huam a ni.

Vawiin hun hmannaah hian thupui (session) hrang hrang hmanga zirtirna pek a ni a. Chawhma lamah Pu John Lalmuankima Ralte, Faculty, ETC (K) chuan VB-GRAM-G Act, 2025 in a tum leh a thlir lawk (Vision & Objectives) te, leh he dan hnuaia VC (PRI) te mawhphurhna hrang hrangte a zirtir a.

Chawhnu lamah Pi T. Lalchhanhimi, Faculty, ETC (K) in VGPP buatsaih leh pawm dan te, chhungkaw inziahluh (registration) leh GRG pek chhuah dan te leh hmasawnna hnathawh ruahman leh vil zui dan (monitoring & maintenance) te a sawifiah a. Hemi hnu hian Pu L.R. Lalrinmawia Hnamte, Head Faculty, DPRC chuan thingtlang hmasawnna hna dangte nena thawhho dan (convergence) te, fiah leh langtlang taka hna thawh , mipuite endik (social audit), leh harsatna thlente chinfel dan tur (grievance redressal) chungchangte a sawipui bawk a ni.

He hunah hian zawhna leh chhanna hun tha tak hman niin, tlai dar 4:00 ah hlawhtling taka tihtawp a ni.