1710/2026-2027

Dated Khawzawl, the 10^th August, 2026 : Vawiin khan Chief Medical Office, Khawzawl District huaihawtin Little Learner School, Khawzawlah National Deworming Day (August Round) pualin hun hman a ni a. Khawzawl District Addl. Deputy Commissioner Pu K. Zorammuana chu khuallian niin, Chief Medical Officer Dr. Shahnaz M. Zothanzami’n hun a kaihruai.

Khuallian Pu K. Zorammuana chuan National Deworming Day hi mipuite hriselna atana sawrkar hmalakna pawimawh tak a nih thu sawiin, zirlai naupangte chu ei leh ina fimkhur turin leh vawiina kut sil dan an zir chu hre renga zawm ngei turin a chah a ni.  

Sr. Medical Officer Dr. Zozikpuii chuan uluk taka kut sil fai dan a takin naupangte a zirtir a, rulhot hlo eitir an ni bawk. District Programme Manager Pu Laldinsanga chuan lawmthu sawiin hun a khar. 

National Deworming Day (Rulhut hlo sem runpui neih ni) hi kum khatah vawi hnih -February thla leh August thlaah neih thin a ni a. Rulhut hlo (Albendazole) hi naupang kum 1-19 inkar hnenah pek tur niin,  kum 1 leh kum 2 inkar naupangte hnenah 200mg (a chanve) pek tur a ni a, kum 2 chin chunglamte hnenah 400mg (a pum) pek tur a ni.