4644/2025-2026

Lunglei, 2026 Ramtuk thla ni 27: Vawiin khan Lunglei District Bawrhsap Pi Navneet Mann kaihhruaiin Lunglei DC Conference Hall-ah Lunglei District chhunga sawrkar laipui Ministry of Social Justice & Empowerment hnuaia kutdawhte dinhmun siam ṭhatna tur ruahmanna, "Support for Marginalised Individuals for Livelihood and Enterprise" (SMILE) kalpui tura hma lakna hrang hrang thlir ho a ni.

Bawrhsap Pi Navneet Mann chuan SMILE chu vantlang zinga dinhmun chhe zawk (marginalised individual)-te'n nun khaw chhuahna leh eizawnna ṭha an neih theih nana an dinhmun siam ṭhatna tura sawrkar laipui ruahmanna a nih thu sawiin, he hma lakna hi Lunglei khawpui chhungah hlawhtling taka kalpui a nih theih nan mawhphurtu hrang hrangte theih tawp chhuah turin a chah.

SMILE kal tlanga hma lakna turah hian Lunglei khawpui chhunga hma lakna bul ṭan nan veng pali — Bazarveng, Chanmari, Electric Veng leh Venglai te thlan niin, survey team pali dinin he'ng veng palia kutdawh awm zat zir chianna (survey) kalpui a ni a. Survey team-in he'ng veng palia SMILE Scheme hnuaia hma lakpui tur an thlan chhuahte chu an dinhmun leh nihphung (profile) te thlir ho a ni a. SMILE Scheme-in 'kutdawh' a tih huang chhunga khung theih an nih leh nih loh lo zir chiang turin District Social Welfare Officer chu ruat a ni.

District Level Committee on SMILE chuan Scheme-in a phut angin Lungleia SMILE Scheme hnuaia hma lakna kalpuitu, Implementing Agency atan leh chenna in nei lote awmna hmun, Shelter Home atan Lunglei Home TNT an thlang a. SMILE scheme hnuaia hma lakpui tura thlante chu an mamawh bulpui hrang hrang ngaihtuahsak bakah, kutdawh ngai lova eizawnna leh mahni intun nunna an neih theih nan thiam thil zirtirna leh kaihhruaina te pek zui tura tih a nih angin, Aadhaar Card mamawh siamsak te, thawmhnaw leh thianghlimna atana bungraw mamawh pek te leh thiam thil zirtir (skill development training) te a ṭul anga kalpui chhunzawm ni se, tih a ni.