4645/2025-2026

Lunglei, 2026 Ramtuk thla ni 27: Vawiin khan Lunglei District Consultative Committee (DCC), District Level Review Committee (DLRC) leh District Level Security Committee (DLSC) chu Lunglei District Additional Deputy Commissioner Pi Zoramdini kaihhruaiin Lunglei DC Conference Hall-ah an ṭhu khawm.

He ṭhut khawmah hian Lead District Manager Pu R. Lalmalsawma, RBI Aizawl Lead District Officer leh NABARD Lunglei District Development Manager Pi Chiinngaihkim Phiamphu te bakah, bank hrang hrangte, line department-te leh tlawmngai pawl ai awhte an tel a. Kum 2025 October aṭanga December thla (3rd Quarter, 2025–2026) chhunga Lunglei District-a bank hrang hrangte hna thawh thlir let niin, hmachhawp an neih leh hma lak zui dan tur te sawi ho a ni.

He hunah hian bank sum vawn himna (security) lam leh pawisa leng vel (currency management & remittance) chungchang sawi ho a nih bakah, vantlang hamṭhatna atana sawrkar ruahmanna — Pradhan Mantri Jeevan Jyoti Bima Yojana (PMJJBY), Pradhan Mantri Suraksha Bima Yojana (PMSBY) leh Atal Pension Scheme (APY) te thlir ho a ni a. PMJJBY-a inziak lut thei mi 64,022-ah mi 10,865 (16.97%) leh PMSBY-a inziak lut thei mi 90,742-ah mi 23,031 (25.38%) inziak lut an awm thu leh APY-a inziak lut mi 2,470 an awm thu tar lan niin, ṭan lak lehzual ni se, tih a ni a. Bank hrang hrang, Lead Bank Office leh Centre for Financial Literacy (CFL) Lunglei (CRISIL Foundation) te'n Financial Literacy Campaign ṭum 62 an buatsaih thu leh mi 2,244-in an chhim thu tar lan niin, FLC hi ṭha taka kalpui chhunzawm zel turin bank-te'n ṭan la tlang se, tih a ni bawk.

Bank-a mipuiin sum an dah luh (deposit) zat za zela bank-in mipuia sum an puktir (credit) zat chhutna, Credit/Deposit Ratio (CD Ratio)-ah Lunglei District-a bank branch 24 te'n 3rd Quarter 2025–2026 chhungin CD Ratio 69.76% an nei tih tar lan a ni a. Annual Credit Plan (Priority Sector)-ah loan cheng nuai 14,557.49 pek chhuah niin, ACP (Non-Priority Sector)-ah loan cheng nuai 13,651.57 hu pek chhuah a ni thung a. Bana Kaih (Handholding) hnuaia loan pek tur chu bank-te'n an pe chhuak ṭha thawkhat tih tar lan niin, Mizoram sawrkar flagship programme a nih ngaih pawimawh a, chak zawka bawhzui zel ni se, tih a ni.

Kisan Credit Card (KCC) hnuaiah crop loan 1,759 (cheng nuai 2,828.77); animal husbandary loan 1,057 (cheng nuai 1,553.00) leh fishery loan 1 (cheng nuai 2) pek chhuah niin, PMEGP loan 75 (cheng nuai 416.63) leh MUDRA (PMMY) loan 1,357 (cheng nuai 2,223.82) pek chhuah a ni bawk a. PMJDY hnuaiah bank account 63,952 awmin, 25.02% chu zero balance account a ni a; RuPay Card pek chhuah 42.46%, RuPay Card nung 87.49% leh Aadhaar nena thlun zawm 64.72% a awm a. RSETI hnuaiah loan dilna 10-ah 4 chu pek tawh niin, 6 chu buaipui mek a ni.

He hunah hian National Bank for Agriculture and Rural Development (NABARD), Mizoram Regional Office, Aizawl-in a buatsaih Lunglei District chhunga kum 2026–2027 chhunga agriculture kaihhnawih leh bank behchhana hma lak theihna tur ruahmanna, 'Potential Linked Credit Plan 2026–2027' chu Chairman Pi Zoramdini chuan a tlangzarh nghal a. Sum pek chhuah theih tura tinzawn chu cheng vaibelchhe 469.27 a ni.