4646/2025-2026

Lunglei, 2026 Ramtuk thla ni 27: Nimin khan Lunglei District chhunga Election official-te, Electoral Registration Officer (ERO)-te leh Assistant Electoral Registration Officer (AERO)-te chu District Election Officer Pi Navneet Mann hovin a hna thawh pindanah an ṭhu khawm a, Lunglei District chhunga electoral roll endik runpui, "Special Intensive Revision" (SIR) kalpui tur chungchang an sawi ho.

He hunah hian SIR awmzia leh kalphung tur te, SIR lo awm tura ERO-te, AERO-te leh Booth Level Officer (BLO)-te tih tur hrang hrang te inhrilhfiah niin, hmachhawp hrang hrang hlen chhuah dan tur sawi ho a ni a. Lunglei DEO Pi Navneet Mann chuan official-te chu anmahni bial ṭheuhva tluang tak leh felfai takah SIR kalpui a nih theih nan theih tawp chhuah turin a chah.

Special Intensive Revision hi India ram pum huapa kalpui mek niin, Bihar-ah leh state 12-ah tih tawh a ni a. Mizoramah chuan SIR hi kum 2005 khan kalpui lo ni tawhin, SIR-ah hian Election Commission of India-in Electoral Roll a siam endik leh siam ṭhat runpui kalpui ṭhin a ni a. Electoral Roll dik leh felfai zawk neih theih nan te, duplicate (voter awm nawn) a awm loh nan leh paih ngaite paih an nih theih nana ruahman niin, kumin April aṭanga kalpui ṭan tum a ni a. SIR-ah hian roll-a chuang tur ngeite chauh an chuan theih nan leh hmaih palh an awm loh nana hmalak tur niin, BLO-te'n in tinah kal chilhin House-to-House Verification an tih vek dawn bakah, elector zawng zawngte'n Enumeration Form an dah khah a ngai dawn bawk a ni.

Lunglei District hi Assembly Constituency parukah ṭhen niin, tun dinhmunah voter 1,02,772 an awm mek a. Polling Station 180 awmin, BLO mi 180 leh BLO Supervisor mi 29 an awm mek a. Assembly Constituency paruk — 30–Lunglei North, 31–Lunglei East, 32–Lunglei West, 33–Lunglei South, 34–Thorang leh 35–West Tuipui te hi ERO leh AERO pakhat zelin an enkawl a ni.