4647/2025-2026

Lunglei, 2026 Ramtuk thla ni 27: Lunglei District Social Welfare Office leh Mizo Upa Pawl (MUP), General Headquarters, Lunglei ṭang kawp huaihawtin nimin khan Lungleia Saikuti Hall-ah hlawhtling takin "Upate Kut" buatsaih a ni.

He Upate Kut hi MUP General Headquarters President Pu B. Lalchungnunga'n a kaihruai a. Upate Kut chu tun hmain an la hman ngai loh thu leh Lungleiah chuan a vawi khatna a nih thu a sawi.

Lunglei District Social Welfare Officer Pu C L Joseph chuan Upate Kut chu Ministry of Social Justice & Empowerment hnuaia Atal Vayo Abhyuday Yojana sub-scheme, State Action Plan for Senior Citizens hma laknaa buatsaih a nih thu a sawi a. State Action Plan for Senior Citizens chuan hlim taka upate'n hun an hman ve theih nana programme buatsaihsak te, upate leh naupang zawkte inkar zau lutuk tur tihzim te, upate hnena hriselna leh ei leh in ṭha zirtir te a tum a nih thu a sawi.

He hunah hian Department of Ayush, Civil Hospital Lunglei aṭangin Medical Officer (Ayush) Dr C. Lalhmangaihsangi, Dietician Pi Zonunmawii leh Physical & Stress Management Professional Dr Reuben Lalṭhazuala te'n hriselna chungchang te, ei leh in ṭha chungchang te leh mahnia insawizawi dan te an zirtir a. MUP member-te leh YMA member-te aṭangin chanvo hrang hrang ngaihthlak leh thlir ho niin, intihhlimna hrang hrang buatsaih a ni a. Lawmman hrang hrang sem niin, ALIMCO PMDK Aizawl aṭangin upate puitu hmanrua (assistive device) hrang hrang sem a ni bawk.