4648/2025-2026

Lunglei, 2026 Ramtuk thla ni 27: Lunglei District Bawrhsap hma laknaa Lunglei District-a vohbikte chawi kanna tur ruahmanna — Project LEAP (Lunglei's Empowerment for Access and Equity for all Persons) hnuaiah vawiin khan Tlabung RD Block chhunga Tlabung Sub-Divisional Hospital-ah leh Tuichawngah te vohbikte hriselna dinhmun endikna, health assessment camp buatsaih a ni.

Health & Family Welfare Department Lunglei aṭangin Sr Specialist (Orthopedician) Dr Joseph Lalrindika Chawngthu hovin Audiologist, Clinical Psychologist leh Ophthalmic Assistant te, NCD Medical Team te, Social Welfare-a thawktute leh Tlabung SDO(C)/BDO staff-te'n a hmunah kal chilhin, camp pantute hi an endik a. Tlabung Block khaw hrang hrang aṭangin vohbik mi 82-in camp hi panin, an dinhmun endik a nih bakah, UDID card nei thei mi 68 chu card siamsak turin UDID portal-ah thun nghal an ni a. ALIMCO aṭanga ṭanpuina hmanraw chi hrang hrang — wheelchair, bengdar, mitdel tiang, zakdawh tiang leh hmanraw dang dilsak turte chhinchhiah nghal an nih bakah, Healthy Lunglei District Campaign hnuaiah natna inkai chhawn theih loh (non-communicable disease — NCD) leh natna dang endik nghal a ni bawk.