Vawiin khan Saikuti Hall Lungleiah Kuthnathawktute Ni hman a ni a, Lunglei District chhunga Industry leh Agriculture hnuaia NLUP dawngtute hnenah tanpuina sem nghal a ni.

Kut hnathawktute Ni puala inkhawmah hian khuallian Pu Zodintluanga Minister chuan thu sawiin kum 2008 a Congress Sawrkar a lo pian khan kuthnathawktute hamthatna turin ruahmanna siamin NLUP sem a ni a, hei hian kut hnathawktute tan hmasawnna a thlen mai bakah ram tih chereu zawiinin a ziaawm a, ramngaw pawh a pun belh hle tawh a, sawrkarin ruahmanna fel tak min siam sak hi kuthnathawktuten rinawmna leh taihmakna nen zawm ila, sawrkar department a thawktute pawhin rinawm leh dik takin kan mawhphurhna i hlen ang u a ti.

Vawiin a Kuthnathawktute ni hmanna ah hian Pu PC Lalthanliana Minist5er i/c Horticulture leh Perliamentary Secretary Pu Joseph Lalhimpuia bakah AMFU General Hqrs President Pu Joseph H Thanzuala te pawhin fuihna thu an sawi bawk a ni. Vawiin a NLUP sem takte hi Agriculture Dept atangin mi 1075 hnenah Cheng Nuai 280.92 sem ral a ni a, Industry Dept. hnuaiah NLUP thawh hnihna leh thawh thumna mi 537 te hnenah Cheng nuai 110.9 sen ral a ni bawk.

Vawiina NLUP sen runpui inkhawm hi Pu Rothuama Addl. DC Lungleiin a kaihruai a, chawhnu lamah Kuthnathawktute tana training neih nghal a ni.