Mizoram sawrkar ruahman angin vawiin khan Serchhip DC Conference Hall-ah “Kuthnathawktute Khawmpui” hman a ni a, School Education Minister Pu H. Rohluna chuan khuallian niin he hun hi a hmanpui a, Khual Zahawm atan Pi Vanlalawmpuii Chawngthu, MLA, Chairperson, Mizoram Women's Commission leh Pu R. Vanlalvena, MLA, Chairman, ZOHANDCO te hman an ni.

He hunah hian NLUP 3rd & 4th Phase beneficiary thenkhatte hnenah tanpuina tangkafai sem a ni a, Serchhip-a Sawrkar Gazetted Officer te, MJA member te, Tlawmngai Pawl, District-Level NLUP Committee, Khawtlang leh Kohhran hruaitute, AMFU member te bakah Kuthnathawktute he hun hmang tur hian an kal tha hle a ni.

Khuallian Pu H.Rohluna chuan kalkhawm te hma a thusawiin mirethei leh eizawnna kawnga tanpui ngai ten ei leh bar zawnna kawnga zalenna thar an chan a, zoram khawvar thar leh hmasawnna thar a hrin theihna atana infuih tharna leh rilru thar kan put beiseina nei chunga Kuthnathawktute Khawmpui hi ruahman a ni a ti a, Mizoram Sawrkarin ram hmasawnna atana kutnathawktute dinhmun pawimawhzia a hriat chian em vanga hetiang hun hi hmang an nih thu a sawi bawk. Pu Rohluna chuan NLUP kaltlang hian thei leh thlai thar chhuah bakah ranvulh leh a kaihhnawih peng hrang hrangte, pangang leh sangha khawi te bakah ramngaw leh nungcha humhalh kawngah hma nasa taka lak a ni a ti a, a bik takin farming sector hnuai a thar chhuah thil chi hrang hrangte chu a ngau ngauva tiral lova thil hlu leh to zawk siam chhuah tel thiam hi ngaihpawimawh a tul hle a ni a ti bawk. NLUP kum 6 chhung thahnemngai taka kalpui ani chuan rah tha a chhuah mek zel a, hmuh belh tur pawh a la awm dawn chauh a ni a ti a, NLUP dik taka kalpui anih theih nan endik kawngah felfai taka hma lak a ni a, NLUP a inhnamhnawih ve miah lo Central Agriculture Ministry hnuai a mi NABCONS in NLUP kaltlanga hmalakna te uluk takin a vil reng a, NLUP kum 6 kalpui anih chhunga NLUP Line Department 9 ten beneficiary te chan ai an eiruk sak emaw, duhamna bawlhhlawh emaw avanga mahni ta nilo sum lak pen sak report a awmlo chu thil chhuanawm leh lawmawm tak ani a ti.

Minister chuan a enkawl Industry Department hnuaia NLUP Trade kalpui anih dan zirchiang tura Mizoram University mithiamte sawm an nih thun leh an report denchhena ruahmanna tha zawk leh felfai zawk siam anih thu te sawiin, report ah hian NLUP hlawhtlinna lam hawi a tam zawk a, hei hian min ti phur hle a ni a ti bawk. NLUP kaltlanga hlawk zawka thlai thar anih theih nan leh hralh chhuah aniuh theih nan thlai chi tha supply tur leh "marketing policy" tha lehzual zawk siam a tukl thu pawh sawilangin Sawrkarin hma a lak mek thu a sawilang bawk a ni. NLUP Phase-II atana ruahmanna pawh chak taka kalpui anih thu sawiin NLUP 3rd leh 4th phase benficiary te pawisa dawn tur pawh sanctioned sa a dah that anih thu leh beneficiary te hmalak dan uluk taka enzui chunga semchhuah anih dawn thu a sawi bawk.

Khuallian hian Agriculture, Sericulture, Environment & Forest, leh Fisheries Department hnuaia NLUP 3rd leh 4th Phase beneficiary te hnenah hnenah NLUP first/second installment a sem nghal bawk a ni.

Khualzahawm Pi Vanlalawmpuii Chawngthu, MLA pawhin thu sawiin Sawrkarin kuthnathawktute a ngaihpawimawhzia kuthnathawktute pawhin an hria a, lawmthu sawina tawngkam an dawng reng a, thinlung takin amah pawh a lawm a ni a ti a, NLUP hian sawiselna a tawng nasa in a thlawna sum sem chu thatchhiatna leh dawngdahna inzirtirna ang mai sawi hnawm an awm thin chuan a rilru a tihnat thu sawiin kan hmangaih tak te leh dingchhuak tura kan duh te hnena duhsak taka bultanna tur pek an nih hian a thlawna pek an nih loh mai bakah mawhphurhna lian tak pek an ni zawk a ni a ti a, tha thawh a ngai a, hah pui a ngai a beneficiary pawhin hetiang inchirhthehna duhawmlo tak hi a dikloh zia lantir anih theihna tura hlawhtlinpui ngei tum tur leh rilru siam thar sauh sauh tura a duh thu a sawi bawk a ni.

Khualzahawm dang Pu R.Vanlalvena, MLA pawhin thusawiin hmasawnna hian kuthnathawktute a huam tel loh chuan hmasawnna khingbai a ni a, awmzia a nei thei tak tak lo a ni a ti a, mirethei leh mihausa inkar zau lutuka a awm chuan harsatna lian zawk a thleng thin tih Sawrkarin a hriat vangin kuthnathawktute dinhmun chawisan chu thupui berah a nei a ni ti a, hemi atan huian NLUP scheme tha tak a duang chhuak a, he scheme hian duhthusam zawng zawng a phuhru kher lo mai thei a, chuti chung chuan hetiang ruahmanna aia tha hi a vang ani tih a hriat theihna chu State hrang hrangin an rawn zirchian a kalpui ve dan tur an ngaihtuah hian a tilang a ni a ti a, hmahruaitu kan nih theih nan leh midangte entawn kan nih theih nan hlawhtlinpui tum vek turin beneficiary te a chah a ni.

Serchhip District a MLA Constituency 3 First Phase - Fourth Phase ah NLUP beneficiary 9703 (Agriculture-2393, AH&Vety-1618, Environment&Forest-147, Fisheries-277, Horticulture-2817, Industries-1550, Sericulture-211, Soil&Water Conservation-690) an awm a, First Phase leh Second Phase beneficiary te hnenah an tanpuina sum dawn tur pek kim vek a ni tawh a, Third leh Fourth Phase beneficiary te hi First Instalment pek an ni tawh bawk.

Vawiin “Kuthnathawktute Ni” pual inkhawm hi Serchhip District Bawrhsap Dr. Lalrozama, IAS in a kaihruai a, Pu L.Rinliana, MCS, NLUP Nodal Officer, Serchhip in Report tawi pe in, AMFU aiawhin Pu R.Lalhlimpuia, President, Serchhip District in thusawina hun an hmang a, zawhna leh chhanna hun benglut tak hman an ih hnu in Pu James Lalsiamliana, DAO, Secretary, Serchhip District NLUP Committeeni bawkin in lawmthu sawina hun hmangin a tin a ni.

Education Minister Pu H. Rohluna chuan hemi programme hman zawh hnu hian Serchhip AOC Venga Education Department Office hmun a en nghal a ni.