5048/2025-2026

Lunglei, 2026 Vau thla ni 30 : Vawiin khan Lunglei District Level Authority for Mizoram Government Land Pooling & Management Scheme chu an Chairman, District Bawrhsap Pi Navneet Mann hovin Lunglei DC Conference Hall-ah an ṭhu khawm a. Lungleia sawrkar office hrang hrang ai awhte an tel.

He ṭhut khawmah hian Lunglei khawpui chhunga Subsidiary Intelligence Bureau (SIB) Lunglei Unit Office Cum Residence (OCR) hmun tur leh District Court hmun tur atana ram mamawh dan leh hma lak zui dan tur sawi ho a ni a. SIB OCR hmun tur atan hian department hrang hrang hnenah ram awl an neih dan zawh ni se, ram awl awm dan azirin OCR sakna atan a rem leh rem loh en ho ni se, tih a ni.

Lunglei District & Sessions Judge Pi R. Lalduhawmi leh District Court hotute hnen aṭangin High Court-in District Court ram leh building mamawh dan a duan anga District Court sak len theihna tur hmun remchang an mamawh dan leh an rawtnate ngaihthlak a ni a. Lunglei District Court building luah mek leh department dang ram remchang inthleng tura rawtna awm mek chu hotu sang zawkah thlenin, a ṭul dana bawhzui ni se, tih a ni.