2923/2025-2026

Lunglei, 2026 Pawlkut thla ni 15: Vawiin khan National Disaster Management Authority (NDMA), State DMA leh District DMA te ṭang ho huaihawtin Mizoram district tinah lirnghing vanga chhiatna lo thlen thulha felfai zawka chet lak dan tur en chhinna, "State Level Mock Exercise on Earthquake Disaster" buatsaih niin, Lungleiah chuan hmun hnihah lirnghing vanga chhiatna thleng angin lemchan a ni.

Champhai aṭanga hmar lam deuhva Magnitude 7.1-a naa lirnghing chuan Mizoram hmun hrang hrangah chhiatna thlenin, Lunglei Bawrhsap pisaa District Emergency Operation Centre (DEOC)-ah zing dar 10:00-ah Lungleia chhiatna thlen thu dawn a nih rualin chhiatna thlen hriattirna (disaster siren) tihrik niin, mock exercise hi ṭan a ni a. Lirnghing vangin Lunglei khawpui hmun hrang hrangah chhiatna thleng anga tih chhin niin, hmun hrang hranga chhiatna tenau thleng karah hmun pahnih – Lunglei High Powered Committee (HPC) Office, Chanmari, Lunglei (sawrkar office) leh Lunglei Rahsivenga Pu Lalthanmawia In thlang PWD Quarters leh mimal chenna in bawr chu chhiatna thlenna pui deuh anga lantirin, in chim, inkal pawhna kawng chhia leh kangmei chhuak kara chhanchhuah hna thawh dan leh chet lak dan tur a taka chan chhin a ni.

DEOC atana ruahman DC Conference Hall aṭangin Responsible Officer (RO) & District Bawrhsap Pi Navneet Mann hovin mock exercise hi vil niin, Treasury Office kawt chu chhanchhuah hna thawhnaa hman tur khawl leh mihring innghahna hmunpui (staging area) atan ruahman a ni a; Convention Centre chu hliam tuarte leh chhiatna tawkte awm lailawkna (relief camp) atan ruahman niin, Civil Hospital Lunglei chu mitthi leh hliam tuarte sawngbawlna leh enkawlna atan hman a ni bawk a. Chet lak dan hi State lam aṭangin live video-in an lo vil bawk.

He mock exercise-ah hian chhiatna thlen thu hriat a nih rualin Incident Commander leh chhanchhuah hna thawktu leh chhawmdawl hna thawktu tur team hrang hrangte chu Staging Area aṭanga tirh chhuah nghal an ni a. Chhiatna thlen veleha mipui insaseng dan tur te; chhiatna thleng chungchang thuneitute hnena hriattir thuai dan tur te; quick response team (QRT) leh chhiatna thlenna bul hnaia awm khawtlanga tlawmngai pawlte'n chhanchhuah hna an thawh nghal dan tur te; police lamin lirthei tlan dan an thunun a, chhiatna thlenna hmun an ven dan tur te; chhanchhuah hna thawktu, kang ṭhelhtu leh line department hrang hrangin an mawhphurhna an hlen dan tur te; hliam tuarte'n damdawia enkawlna an dawn thuai theih nana medical team-in an tih tur leh mitthi, damlo enkawl hmasak ngai leh na vak lote thliar dan tur leh damdawi ina phurh dan tur te; chhanchhuaktu pawl lian zawk disaster response force (DRF) te hmanraw chi kim nen an lo thlen huna an chet lak dan tur te a tak ang thei ber tura zir chhin a ni a. Sawrkar department hrang hranga thawktute bakah, DM&R Quick Response Team (QRT), Chanmari leh Rahsiveng khawtlang hruaitu leh YMA member-te'n mawhphurhna hrang hrang lain, mahni mawhphurhna ṭheuhte a ṭha thei ang bera hlen chhuak turin theih tawp an chhuah hlawm a ni.

Chhun lama mock exercise buatsaih ang bawk hian zan lam (tlai dar 4:40 aṭanga dar 6:30 inkar)-ah pawh Rahsivengah hian zan lama chhiatna thlen thulha chet lak dan tur en chhinna buatsaih zui tura ruahman a ni bawk a. Mock exercise zawh fel hnuah video conference kal tlangin chet lak dan thlir hona (debriefing) buatsaih chhunzawm tura ruahman a ni a. Lunglei DC Office Video Conference Hall aṭangin DDMA Chairman Pi Navneet Mann hova chhim niin, incident site hrang hranga site incident commander leh site observer te hnen aṭanga report ngaihthlak a nih bakah, hmasawnna tura rawtna hrang hrang sawi ho a ni ang.

Lunglei DDMA Chairman Pi Navneet Mann chuan mock exercise hlawhtling tak buatsaih a nih theih nana tha leh hmanrua thawhtu zawng zawng chungah leh ṭha taka thuneitute thawhpuitu Lunglei mipuite chungah lawm thu a sawi.