2924/2025-2026

Siaha, the 15th, January, 2026: NDMA, Mizoram SDMA leh District tina DDMA-in Mizoram pum huap Lirnghing thleng anga chet lak dan entirna a huaihawt chu Siahaah pawh vawiinah neih a ni. District Emergency Operation Centre (DC Mini Conference Hall) Siaha aṭangin District Disaster Management Authority (DDMA) CEO Pu Abraham Beirazi Khithie, Additional DC nibawk leh Official- dang ten biakhmuhtheihna kaltlangin hun hman hi an vil.

Siahaah hian Lirnghing avanga harsatna thlenna hmun hi hmun hnihah a awm a, chungte chu:-
1. Mipui chenna hmun New Colony – I (Hillgate school bul.)
2. Bus accident-na hmun New Colony, Bus Station bul.

Vawiin lirnghing thleng anga entirna hi chawhma dar 10 AM ah ṭan niin Champhai district hmar lam aṭanga intanin magnitude 7.1 a na-in a nghing a. Lirnghingin chhiatna a thlente chu - in chim, in chim avanga kangmei chhuak leh in chim kara mihring tang bakah town bus tlan lai accident te a ni.

Chhiatna thlenna hmunah hian Site Incident Commander (SIC), Staging Area Manager (SAM), Relief camp manager leh Observer dah an ni a, mobile signal a awm loh avangin MPRO kaltlang veka inbiak niin District Emergency Operation Centre (DEOC) a ṭhute kaltlangin Search & Rescue Team (VDMC, Assam Rifles, Police/IR, Quick Response Team, P&E, Fire and Emergency Services) leh Medical team-te tirchhuah nghal zel an ni.

Vawiina hun hman dan tlangpui chu:-
1. Chawhma dar 10: 00 AM ah Lirnghing avanga chhiatna thlenna hmuna VC/VDMC te’n DEOC-ah chhiatna a thlen thu an hrilh a.

2. DDMA member, Site Incident Commander, Staging Area Manager-te chu DEOC-ah an awm a, hriattirna an dawn zulzuiin lirnghingin chhiatna a thlenna hmunah te hian ṭanpuina leh chhawmdawlna hna thawktute an tir nghal a.

3. Chhiatna thlenna hmunah hian Incident Command Post, Staging Area leh Medical Aid Post buatsaih a ni a, veng chhung hmun remchang lai (MTP Hall) ah relief camp buatsaih a ni bawk.

4. Hliam tuarte Medical team-in an enkawl a; a nat dan azira chhinchhiah (triaging) te pawh an ti nghal. Damdawi ina thawn ngaite ambulance leh motor dang remchang hmangin an thawn bawk. SIC-in DEOC-ah report (chhanchhuah zat, hliam zat, damdawi ina kalpui zat, etc) a pe zel a. Relief Camp Manager-in Relief Camp-a lut zat leh ṭanpuina pek dan report a pe bawk.

5.    Tlai dar 5-ah mipui chenna hmun New Colony – I (Hillgate school bulah) lirnghing nawnleh (aftershocks) anga entirna hi neih chhunzawm tur niin mawhphurna hrang hrang neite an che chhuak leh anga, zan dar 6:30 PM ah zawh fel a ni ang.