4758/2024-2025

Lunglei, 2025 Vau thla ni 21: Vawiin khan Lunglei Municipal Council (LMC) Board of Councillors (BoC) chu an Chairman, Pu Lalzuithanga kaihhruaiin BoC Hall, Convention Centre, Lungleiah an ṭhu khawm.

LMC BoC ṭhu khawm chuan kum 2025-26 chhunga Property Tax floor rate atan kum 2024-25-a hman lai 3.42% chu hman rih ni se, an ti a. Kum 2025-ah Krismas bazar siam ngei ni se tiin, ruahmanna siam turin Task Force Committee on Krismas Bazar an din nghal a. Kum 2025 Krismas vuakvetah LMC huam chhung veng hrang hrang tan khawlai leh kawn chei inelna buatsaih relin, lawmmanah pakhatna ₹ nuai 3, pahnihna ₹ nuai 2, pathumna ₹ nuai 1 leh veng pathum tan consolation prize ₹ 30,000/- ṭheuh ruahman ni se, an ti bawk.

BoC ṭhu khawm chuan mela, flying business, road show, exhibition, music festival leh a kaihhnawihte chu LMC Licensing Regulations, 2024 hnuaia rin luh belh a nih angin phalna pek leh khuahkhirh kawngah a ṭul anga hma lak zui ni se, an ti a. LMC Display of Advertisement & Hoardings Regulations, 2024 hnuaiah kum 2025-2026 aṭangin hoarding chu tender system-a kalpui relin, LMC huam chhunga veng hrang hrang chu zone-a ṭhenin, hoarding leh no hoarding zone kalpui tum a ni a. Lungleia park awm - Laldenga Park, District Park leh Lunglei Park te chu LMC hnuaia enkawl a nih theih nan leh Lunglawn rama Solid Waste Management Centre sak mek chu a hma thei ang bera zawh a nih theih nan hma lak an rel a. LMC Award (ward fai inelna) chu endik zawh tawh a nih angin a hma thei ang berin lawmman semna buatsaih ni se tiin, khuallian atan Health & Family Welfare Minister Pi Lalrinpuii leh khual zahawm atan Urban Development & Poverty Alleviation Secretary Pu Lalmalsawma Pachuau te sawm ni se, an ti bawk. 

LMC BoC ṭhu khawm chuan LMC huam chhungah pawl leh mimal anga lei hnuaia tui verh chu khap ṭha tiin, sawrkar dan awm sa zul zuia hma lak zel dan tur zir chian a, en nawn leh ni se, an ti a. LMC huam chhungah chhiarpui (demographic census) buatsaih a nih theih nan Directorate of Economics & Statistics lam dawr a, a ṭul anga bawhzui leh hma lak an rel bawk. 

LMC Board of Councillors ṭhut khawmah hian Chairman bakah, Vice Chairman Pu K. Lalrinawma leh executive councillor-te leh elected councillor dangte telin, LMC Chief Executive Officer Pu Donny Lalruatsanga'n a telpui bawk a ni.

Attachment

  • Loading attachment...