4990/2025-2026

Lunglei, 2026 Vau thla ni 24: Vawiin khan Lunglei Municipal Council (LMC) Board of Councillors (BoC) chu Vice Chairman Pu K. Lalrinawma kaihhruaiin Lunglei Convention Centre-a BoC Meeting Hall-ah an ṭhu khawm.

Ṭhut khawm kaihruaitu Pu K. Lalrinawma chuan Mizoram sawrkarin LMC a enkawl danah leh a duhsaknaah lawm thu sawiin, Lunglei khawpuiin kawng hrang hranga hmasawnna hmel a hmu chho zel chu lawmawm a tih thu a sawi a. LMC Councillor-te pawhin an Ward an enkawlna ṭheuhvah theih tawp an chhuaha a hriat thu leh eirukna leh hlemhletna lakah pawh an fihlim tlang hle nia a hriat thu sawiin, lawmawm a tih thu a sawi.

Vawiin BoC ṭhut khawmah hian LMC huaihawta a ṭum khat nana Lunglei Ni hman zawh tak thlir let a ni a. BoC ṭhu khawm chuan kumin March ni 4-a Lunglei Ni hman chu hlawhtling hlea an hriat thu sawiin, kum dangah pawh changtlung zawk leh uar zawka hman ṭhin ni se, an ti.

He ṭhut khawmah hian kum 2026–2027 chhunga LMC Budget atana cheng nuai 1,895.62 (₹18,95,62,000/-) ruahman chu pawm a ni a. LMC huam chhunga veng fai inelna buatsaih ni se tih niin, hemi atan hian cheng nuai nga (₹5,00,000/-) ruahman a ni a; Municipal Sanitation Committee-in lo bawhzui se, tih a ni.

Kum 2026 Krismas dawnah mipui kea veivakte'n harsatna an tawh loh nan lirthei tlan phal lohna hmun, "No Vehicle Zone" siam ni se, tih a ni a. Rural Development & Administration Department aṭangin Chanmari-II huam chhunga Lunglei Park chu LMC kutah hlan a nih tak avangin he Park cheibawl hna leh enkawl chhunzawm dan tur ruahmanna siam thuai ni se, tih a ni a. Hun remchang hmasa berah LMC Councillor-te'n a huhovin a hmun ngeiah hma lak dan tur en ho ni se, tih a ni.