2347/2026-2027

Lunglei, 2026 Mimkut Thla ni 24: Vawiin khan Lunglei Municipal Council (LMC) Board of Councillors (BoC) chu an Chairman Pu Lalzuithanga kaihhruaiin Lunglei Convention Centre-a BoC Meeting Hall-ah an ṭhu khawm.

Chairman Pu Lalzuithanga chuan LMC hma lakna leh hna thawh hrang hrang tar langin, councillor-te thawh hona te, official-te ṭhahnem ngaihna leh mipuite ṭawiawmna avanga LMC-in hma a sawn zel chu lawmawm a tih thu a sawi a. Mizoram sawrkarin a ngaihsakna leh duhsaknaah lawm thu a sawi bawk.

LMC BoC ṭhut khawmah hian Krismas 2026 atana inbuatsaihna ṭul hrang hrang sawi ho a ni a. Krismas 2026 lawmna chi khat atan kawtthler/veng/kawn chei intihsiak buatsaih ṭha tih a ni a. Pakhatna lawmmanah ₹3,00,000/-, pahnihna lawmmanah ₹2,00,000/- leh pathumna lawmmanah ₹1,00,000/- ruahman niin, he'ng bakah hian a ti ṭha veng pathum tan consolation prize ₹30,000/- ṭheuh pek ni se, tih a ni.

Krismas Bazar siam ṭha tih a ni a. A ṭul anga hma laa bawhzui turin Krismas Bazar Task Force Committee din niin, Chairman atan LMC Chairman leh Secretary-ah LMC Chief Executive Officer (CEO) te ruat an ni.

Krismas Bazar hun laiin lirthei luh theih lohna chin, No Vehicle Zone siam ṭha tih a ni a. LMC hnuaia Traffic and Transport Coordination Committee (TTCC) chu ruahmanna kimchang lo siam tura tih niin, No Vehicle Zone huam chhunga intihhlimna buatsaih leh thil ṭul dangte chu Krismas Bazar Task Force Committee-in ruahmanna a siam thung ang.

Lunglei Ni, 2027 chu hman ṭha tih niin, a huaihawt turin Organising Committee din a ni a. Chairman atan LMC Chairman leh Secretary atan LMC CEO te ruat niin, LMC Executive Councillor-te nen member dangte lo ruat belhin, an ruahmanna siamte BoC Meeting-ah chhawp chhuah leh ni se, tih a ni.

Vawiina LMC Board of Councillors ṭhut khawmah hian Chairman Pu Lalzuithanga, Executive Councillor Pu Zorinsanga Hmar leh Pi Lalhruaitluangi Sailo te bakah, Councillor dang 6 an tel a. LMC CEO Pu Lalhmansanga'n a telpui bawk.