2346/2026-2027

Champhai dated the 24th September, 2026: Vawiin khan DC Conference Hall, Keifangtlang-ah National Human Rights Commission (NHRC) Special Rapporteur Pu Sayeed Ahmed Baba hovin meeting neih a ni.

NHRC Special Rapporteur Pu Sayeed Ahmed Baba chuan mihringte dikna chanvo humhim turin kawng engkimah rilru zau zawk mitinin an put a pawimawh thu a sawi a. Mihringte dikna chanvo chu hmun engemaw thlan bik ah chauh ni lo in, hmun tinah dah pawimawh vek a ngai a ni, a ti a. Tunlai khawtlang nunah rirlu lama harsatna depression leh anxiety a pung chho nasa hle tih sawiin, heng harsatna hrang hrangte tibo tur hian rilru hriselna ngaihpawimawh a tul thu a sawi.

Special Rapporteur chuan Mizoram-a Tele-MANAS helpline (rilru lama harsatna neite tanpuina) changtlung zawka kalpuia, a number-te mipui hriat tura tarlan leh helpline kaltlanga counsellor-te nena inbiak pawhna chak zawk kalpuia, harsatna tawk ten puihna an dawn zung zung theih nana hmalak a tul thu a sawi a. District Hospital-ah psychiatrist, psychologist leh counsellor-te daha, OPD leh Ward-a awm mekte hnenah counselling chak taka pek a pawimawh thu leh rilru lama harsatna tawkte enkawlna tur ward hran siam a ngaihpawimawh thu a sawi bawk.

Meeting-ah hian Champhai DC Pu Mohammad Aaquib chuan inlawmna thu a sawi a, SDC Pu Lalchhuanawma Ralte chuan district chhunga mihring dikna leh chanvo humhalhna vawn nun dan leh hmasawnna hrang hrang PowerPoint presentation hmangin a tarlang a ni.

Vawiin meetingah hian Champhai SP, CMO, DMS, DIPRO, DSWO, DPO, DCPO, Superintendent, Prison & Correctional Home, Sub Hqrs YMA, MHIP hruaitute an tel a ni.

NHRC Special Rapporteur hian meeting a neih zawh hnuah One Stop Centre, Shakti Sadan, Mazuia Memorial Home (TNT), District Jail leh Meta Khen te tlawhin thawktute a kawm a, an hnathawh te enpuiin hmasawnna an neih thei dan turte a sawipui bakah enkawlna dawngtute a kawm a ni.