2345/2026-2027

Lunglei, 2026 Mimkut Thla ni 24: Mizoram sawrkara Art & Culture (A&C) Department leh Mizo Academy of Letters (MAL), Joint Headquarters, Lunglei huaihawtin vawiin khan A&C Auditorium, Venglai, Lungleiah Mizo ṭawng chungchang zir hona, "State Level Seminar on Mizo Ṭawng" hun hman a ni.

MAL Jt Hqrs Lunglei President Pu C. Hrangdula kaihhruai Seminar inkhawmah hian Khuallian, YMA Sub-Headquarters Lunglei President Pu K. Lalfakzuala chuan Art & Culture Department leh MAL Jt Hqrs Lunglei te'n Mizo ṭawng chungchang zir hona an buatsaih chu lawmawm a tih thu leh an veina leh ṭhahnem ngaihna chu mipui lamin an veipui pha tawk lo erawh pawi a tih thu a sawi a. Mizote'n mahni puala ṭawng kan nei hi Pathian malsawmna min pek a ni tiin, hetih lai hian kan ṭawngin hliam a tuar tih phat rual a ni lo va, kan ṭawngin hliam a tuar chuan kan hnamin hliam a tuar a, min hliamtu chu eng nge tih chhut ngun a, English medium a ni em, social media a ni em tih ngaihtuah ngun a ngai a ni, a ti.

Pu K. Lalfakzuala chuan ṭawng dang thiam avanga mahni hnam ṭawng thiam lo chu mi chanve an ni tiin, hnam hrang hrang ṭawng chu Pathianin a pawm avangin mahni ṭawng kan zahpui tur a ni lo va, kan humhalh tlat zawk tur a ni, a ti a. Ṭawng dang hmanga kan pianpui ṭawng kan pawlh dal lutuk chuan kan hnunga lo kal zel turte tan then fai tur kan hnutchhiah nasa lutuk ang tih a hlauhawm tiin, Mizo ṭawng a vul zel theih nan Mizo ṭawng humhalh tura theih tawp chhuah turin mipuite a sawm.

Lungleia Mizo ṭawng chungchang Seminar-ah hian MAL Jt Hqrs Lunglei member-te bakah, tlawmngai pawl hruaitute, Lunglei khawpui chhunga college hrang hrang zirlaite leh MJA member-te an tel a. MAL Jt Hqrs Lunglei Adviser Rev. RC Lalthanzama'n hunserh hmangin, Sr Research Officer & Organising Committee Chairman Pu Lalmuanpuia'n inlawmna thu a sawi a. MAL Jt Hqrs Lunglei Vice President Pu Pc. Lalduhthlanga leh Assistant Treasurer Pu K. Vanlalzama te kaihhruaiin thupui zir hona hun hman zui a ni.

Seminar-ah hian thupui sawitu pathum awmin, Lunglei Government College (LGC)-a Assistant Professor Pu Rochharzela buatsaih, "Mizo ṭawng ṭobul, humhalh leh tih hmasawn" tih te, Pu TC Jonunsanga buatsaih, "Mizo ṭawng nihphung, danglamna leh mawina" tih leh Pu Vanneihtluanga buatsaih, "Mizo ṭawng leh tunlai thiamna" tih te zir ho a ni a. Sawi hona hun hman a ni bawk.