178/2025-2026

Lunglei, 2025 Ṭau thla ni 15: Vawiin khan Lunglei Municipal Council (LMC) Chief Executive Officer (CEO) Pu Donny Lalruatsanga chuan a office chamber-ah Lunglei Tui Zuar Association hruaitute a kawm.

LMC CEO Pu Donny Lalruatsanga chuan Lungleia tui phura ei zawngte chu sumdawng satliah an ni lo tih leh mipui rawngbawl an ni tih inhre reng a, tui thianghlim ei tlak ngei chauh ei atan phur a, hralh ṭhin tura ngenin, mipuiin tui an mamawhna a san avang leh tui a van avanga tui man tisang lo tur leh mipui dinhmun ngaihtuah chunga sumdawnna kalpui turin a ngen a. Sawrkarin LMC kuta thuneihna a pek angin, miin LMC huam chhungah sumdawnna a kalpui dawn chuan LMC aṭangin phalna (licence) a neih ngei a ṭul tih sawiin, he dan hi sumdawnna atana tui phura zuar ṭhinte pawhin an zawm hram hram a pawimawh thu a sawi a. LMC-in March 2026 ral hma ngeia tui phurte'n LMC aṭanga phalna (licence) la vek tura ruahmanna a siam chu tun laiah hri ṭha lo, mihring nunna atan thleng pawha pawi thei te a awm avanga inven leh inkhuahkhirh awlsam nan leh hming chhiatna leh harsatna thleng thei laka inven tawn theih nana ruahman a nih thu sawiin, tui hmanga sumdawngte chuan hre thiam a, zawm ṭheuh turin a ngen a ni.

Lunglei Tui Zuar Association hruaitute chuan tun laia tui harsatna karah an duh khawp tui chawi tur an hmuh loh thu leh tui chawi tam zawk chu an pawla inpe lem lo an nih avanga inven vek a harsat thu sawiin, an pawl member-ah chuan tui thianghlim chauh phur tura thu an chhuah a, an infuih ve fo thu an sawi a. Tui chawi man (rate) chungchangah tui an pek turte nena inremsiam vek hnuah chauh a man an san ṭhin thu sawiin, an chawi hlat dan azirin an rate a san ve zel thu an sawi a. Mat tui chawi lem lote'n hralh to an duh luatah Mat tui anga sawi an awm ṭhin chu pawi an tih thu sawiin, mipuite pawh fimkhur turin an chah a ni.

Attachment

  • Loading attachment...