177/2025-2026

Dated Kolasib the 15th April 2025: Vawiin khan kolasib DC office Chamber ah Kolasib DC Pu Robert C Lalhmangaiha leh SP, Pu David H Lalthangliana hovin Kolasib a NGO pawl hrang hrang hruaitute leh MJA ten inkawmhona hun an hmang.

He hunah hian Kolasib DC chuan hun rei tak natna in a tlakbuak avanga damdawiina a awm chhunga Kolasib District ah harsatna leh buaina lian tham a awm lo chu lawmawm a tih thu sawiin, Pawl hrang hrang aiawhte khawtlang him na leh hmasawnna atan a an inpekna te chu a lawmawm takzet a ni, a ti.

DC chuan tunlai ah Mizoram hmun hrang hrangah harsatna, a bik takin ruihhlo chungchangah a hluar hle a. He ruihhlo do hna hi chak lehzual a an thawh a ngai a ni a ti a. Heng bakah hian Kolasib District tana thil tul leh pawimawhzual a tihte tarlanna neiin, thawhpui turin kalkhawmte chu a sawm nghal a ni.

Thutkhawmna ahhian MJA Kolasib aiawhten Durtlang atanga Kolasib panna kawng siam te hna kal muan lutuk avanga mipuiten an tawrhna chungchang an thlen te, Ruihhlo do chungchanga chak zawka hmalak dan turte, Kolasib khaw chhunga commercial vehicle stand te felfai zawka siam rem dan tur chungchangte, Raltlan chungchangte leh tul dangte an sawiho a, a hma thei ang bera hemi chungchang bawhzuina meeting koh nise an ti bawk.

Vawiin thutkhawmnaah hian DC leh SP Kolasib bakah Sub Hqrs YMA, MHIP, MUP Kolasib leh NGO Co-Ordination committee aiawhte an tel a ni.