2560/2026-2027

Lunglei, 2026 Khuangchawi Thla ni 7: Vawiin khan Lunglei Municipal Council (LMC) hnuaia Municipal Sanitation Committee (MSC) chu an Chairman, LMC Vice Chairman Pu K. Lalrinawma kaihhruaiin BoC Meeting Hall, Convention Centre, Lungleiah an ṭhu khawm.

Municipal Sanitation Committee Chairman Pu K. Lalrinawma chuan member kal khawmte lawmna thu sawiin, Lunglei khawpuiin faina leh thianghlimna lama hma laknaah hma a sawn zel theih nan ngaihtuahna seng a, theih tawp chhuahpui turin a sawm a. LMC hma lakna hrang hrangte a sawi lang bawk.

He ṭhut khawmah hian LMC Ward-II Councillor Pi Lalmuanpuii Renthlei, Ward-V Councillor Pi Zonunmawii leh Chief Executive Officer Pu HD Lalpekmawia te, LMC, DC, UD&PA, PWD, P&E leh I&PR official-te, Local Council Association Lunglei, YMA Sub-Headquarters Lunglei, MHIP Sub-Headquarters Lunglei, MUP Headquarters Lunglei leh MJA Lunglei District ai awhte an tel.

He ṭhu khawmah hian LMC huam chhunga Veng Fai Inelna kalpui mek chungchang sawi ho a ni a. LMC hnuaia local council 24 chu huang (category) hnih – Category-A leh Category-B-ah ṭhenin, LMC BoC chuan Fai Inelna pual hian cheng nuai 5 a ruahman a. Fai inelna hi kalpui mek niin, endiktua ruat Clean Lunglei te chuan ṭum hnih endikna an kalpui tawh thu tar lan a ni a. Clean Lunglei bakah, LMC CEO leh DUDO te, tlawmngai pawl ai awh leh MJA te nen a tawpna atana endikna chu kalpui turin ruahmanna siam ni se, tih a ni a. Fai inelnaa sikul leh office tih tel a nih theih dan tur rawtna te sawi ho a ni bawk.

LMC-in faina leh thianghlimna kawnga hma lakna peng khat atana in tina bawlhhlawh bawm an sem dan report ngaihthlak niin, bawlhhlawh bawm hrang hrang sem hmabak la awmte chu Ward tinah in awm dan milin sem zai ni se, tih a ni a. Solid Waste Management Rules 2026-in a sawi anga chi lia bawlhhlawh thliar hran chu Lunglei khawpui bawlhhlawh sawngbawlna tur, Solid Waste Management Centre-I leh Centre-II te a taka hman theih a nih hunah chak taka bawhzui tum a nih thu leh tun aṭangin mipuiteah inzirtir chhoh mek a nih thu sawi lan a ni bawk.

Faina leh thianghlimna chungchang ngawrh zawka inzirtir turin LMC bul tumin IEC Campaign hnuaiah hma lak mek a nih thu sawi lan niin, Local Council, NGO, sanitation worker leh official-te tana workshop te, inzirtirna leh hma lakna tur hrang hrangte ruahman a nih thu sawi lan a ni a. Hemi kawnga hma lak zui dan tur rawtna hrang hrang sawi ho nghal a ni.

He hunah hian Lunglei Solid Waste Management Centre (SWMC)-I sak mek chu hman theiha peih fel thuai beisei a nih thu leh khawl pawimawhte pawh a lo thlen ṭan thu sawi lan niin, Solid Waste Management Centre-II pawh a sak hna 70% zawh a nih tawh thu sawi lan a ni a. Bawlhhlawh paihna hmuna bawlhhlawh inchhek khawm sate chu thian fai tura hma lak leh sawngbawl mek a nih thu sawi niin, nakina ram leilung tana ṭha tur ngaihtuahin LMC lamin ruahmanna an siam thu leh mipuite leh ram leilung tana hnawksak lo leh him thei ang bera ruahmanna siam a nih thu sawi lan a ni a. Faina leh thianghlimna kawnga Lungleiin hma a sawn zel theih nana mahni in leh a vel leh khawpui vawn fai pawimawhna te, bawlhhlawh thliar hran leh thehthang kawngah fimkhur leh ṭan lak a ṭul thu te sawi ho a ni bawk.