2559/2026-2027

Lunglei, 2026 Khuangchawi Thla ni 7: October ni 5 aṭanga ni 12, 2026 inkar chhunga Right to Information (RTI) Week hman mek pualin vawiin khan Lunglei Convention Centre-ah Lunglei District Bawrhsap Pi Navneet Mann hovin hun hman a ni.

Bawrhsap Pi Navneet Mann chuan RTI Week chu RTI Act chungchang leh a pawimawhna te, ṭha leh ṭangkai zawka hman a nih theih dan tur inzirtirna atan te hman ṭhin a nih thu sawiin, RTI Act chu sawrkar inrelbawlna leh hna thawh hrang hrangte lang tlang leh felfai zawka kalpui a nih theih nana hma lakna pawimawh tak a nih thu a sawi a. Sawrkar hna thawkte chu an thil tih leh thu tluknain mipui a nghawng tih hria a, mipuite hamṭhatna tur leh dan ang taka hna thawk tur leh thu tlukna siam ṭhin turin a chah a. Mipuiin sawrkar an rin ngam theih nan RTI-in a phut anga lang tlang taka thil kalpui tur leh mipui laka an mawhphurhnate ṭha taka hlen chhuah tum tura chahin, mipuite pawhin sawrkar hna thawh tibuai zawng ni lo va, a ṭangkai leh hmasawnna thlen tur zawnga RTI Act chu hmang ṭhin turin a chah.

Lungleia RTI Week 2026 puala hun hman hi Additional Deputy Commissioner Pi Rochuangkimi Khenglawt chuan kaihruaiin, inlawmna thu a sawi a. Lunglei District Information & Public Relations Officer, RTI District Resource Person Pu C. Lalhruaitluanga chuan powerpoint presentation hmangin RTI Dan (Act & Rules) leh a chungchanga hriat tur pawimawh hrang hrang a zirtir a. Zawhna leh chhanna leh sawi hona hun hman a ni bawk.

Lungleia RTI Week puala hun hmanah hian sawrkar office hrang hranga State Public Information Officer (SPIO), State Assistant Public Information Officer (SAPIO) leh RTI lama mawhphurtute, Local Council/Village Council ai awhte, tlawmngai pawl ai awhte, MJA member-te leh RTI hmang ṭangkai ṭhintu (activist)-te an tel a. Lunglei Sub-Divisional Officer (Sadar) Pu Buddhi Akhil chuan lawm thu sawiin hun a khar.