4545/2025-2026

Lunglei, 2026 Ramtuk thla ni 19: Vawiin khan Lunglei Municipal Council (LMC) hnuaia Traffic and Transport Co-Ordination Committee (TTCC) chu an Chairman, LMC Vice Chairman Pu K. Lalrinawma hovin Lunglei Convention Centre-a BoC Meeting Hall-ah an ṭhu khawm a. Lunglei khawpui chhunga lirthei tlan dan leh hun dan kaihhnawiha lehkha lut hrang hrang ngaihtuahin, an sawi ho.

TTCC ṭhu khawm chuan Lunglei khawpui chhung Serkawn leh 3 Gate inkar kawngpui sira side drain khuhna kawngpui zawl aia sanga awm chu lirthei hunna atana hman ṭangkai a nih theih nan a san zawng siam ṭhat a ṭul tiin, Lungleia MLA-te, LMC Councillor-te leh Local Council hrang hrangte hnenah thlen a, siam ṭhat theih dan tur zawn ni se, an ti a. Lunglei khawpuia BSNL telephone ban eng emaw zat chuan kawngpui a tihchep avangin leh telephone ban kawngpui lama awn, kawng tichep leh lirthei hunna tibuai theite chu siam ṭhat a ṭul avangin BSNL hotute hnenah hemi chungchang hi thlen ni se, an ti.

Khawpui chhunga Motor Workshop hrang hrangah lirthei an siam turte kawngpui kam, parking area tibuai zawnga dah an awm ṭhin avangin lirthei hun dan leh tlan dan chungchangah buaina a thlen ṭhin a, LMC Enforcement Staff, Traffic Police leh Local Council hrang hrangte'n hma lain, enfiah se, tih a ni a. Kawngpui kama in sa leh dawrkai ṭhenkhatte'n kawng sir ei heka step leh kailawn an siam avanga lirthei dahna tur tihbuai leh kawng tihchep a awm theih avangin leh an ram chin ni lo an hauh zui zel theih avangin enfiah ṭul tih niin, LMC Chief Executive Officer-in a ṭul angin hma lo la se, tih a ni bawk.

Ramthar huam chhung hmun hniha Auto Rickshaw Stand siam belh leh tihzauh dilna chu mipui vantlang tana hmun a tihchep dawn avangin pek rih loh ni se, tih a ni a. Two Wheeler Taxi Association-in Tlabung peng kual lai Dropping Zone bula Stand pek belh an dilna chu, en chian a, zir chian leh phawt tura dah niin, BSNL office opposite-a Light Motor Vehicle panga hunna tur siamsak tura ngenna lut chu, kawngpui kam ve veah parking a awm chuan lirthei che vel tan harsatna a siam nasa dawna hriat a nih avangin siam rih loh ni se, tih a ni.