4546/2025-2026

Lunglei, 2026 Ramtuk thla ni 19: Lunglei District Bawrhsap (Deputy Commissioner) bul tuma mipuite'n an kawtkaiah ngei an mamawhna zawna sawrkar an dawr theihna, "I Kawtkaiah Sawrkar" (Prashasan Gaon Ki Ore) chu vawiin khan Lungsen RD Block chhunga Lungrang South leh a chhehvel khaw mipuite tan Lungrang South Community Hall-ah buatsaih a ni.

Lungrang South Village Council President Pu Lalmawizuala'n hun kaihruaiin, mipui dawr theiha inpho chhuak department leh office hrang hrang hnenah lawm thu a sawi a. Lungsen Block Development Officer Pu Lalhruailiana Zote chuan "I Kawtkaiah Sawrkar" thil tum sawi fiahin, mipui a tam thei ang berin chhawr ṭangkai tum turin a chah a. Lunglei Sub-Deputy Commissioner Pi Lalnunchhani Hnamte chuan DC hma laknaa "I Kawtkaiah Sawrkar" buatsaih tawh dan a tar lang bawk.

Lungrang South-a "I Kawtkaiah Sawrkar" hun buatsaihah hian department hrang hrang — Deputy Commissioner Office, Block Development Office, Health & Family Welfare, AH & Veterinary, Agriculture, Horticulture, Power & Electricity, Land Revenue & Settlement Department leh Mizoram Rural Bank te'n stall hawngin, awlsam zawka mipuite dawr theih turin an inpho chhuak a. Lehkha pawimawh hrang hrang (Aadhaar, ST/Residential/Income Certificate, Job Card, Land Pass, etc.) siam thar/siam ṭhat te, bank account hawn thar leh service hrang hrang te, mihring leh ran inentir leh hri danna pek te, sawrkar ruahmanna hrang hrang chungchang inzirtirna leh inziah luhna te buatsaih a ni a. He'ng service hrang hrang chhawp chhuahte hi mi 750 velin an chhawr ṭangkai a ni.